Ambasadorja gjermane thotë se Kosova mund të bëhet si Singapori

Kosova një ditë mund të bëhet një shtet i zhvilluar si Singapori, apo Zvicra e Ballkanit. Ky është vlerësimi i ambasadores së Gjermanisë në Kosovë, Angelika Viets.

Ajo duke bërë një krahasim mes shtetit të Kosovës dhe Singaporit, që është njëri ndër vendet më të zhvilluara në botë, thekson se në me 9 gusht 1965, kur Singapori ishte ndarë nga Federata e Malajzisë, ishte një vend sikur Kosova.

Ambasadorja gjermane Angelika Viets, në një shkrim autorial për numrin festiv të gazetës “Kosova Sot”, përmend disa krahasime që sipas saj Kosovën mund ta bëjnë shtet të zhvilluar.

“Kosova ka resurse natyrore shumë të rëndësishme, që Singapori nuk i ka, dhe ka tokë pjellore, ujë të mjaftueshme, mbështetje të bashkësisë ndërkombëtare, veçanërisht të BE-së, e cila nuk i është dhënë edhe aq shumë Singaporit”, ka shkruar Viets.

Ajo po ashtu ka përmendur edhe katër udhëzime të recetës së suksesshme të zhvillimit të Singaporit e që duhet të barten edhe në Kosovë.

1. Vizion për zhvillimin ekonomik

2. Qeverisje e mirë

3. Shkollim, shkollim, shkollim

4. Punësimi i më të mirit, e jo atij që ka lidhje më të mira.