Qeveri pa program

Mungesa e një programi qeverisës nga ana e Qeverisë së Kosovës po vlerësohet të jetë e pakuptimtë. Pavarësisht se të dy partitë menjëherë pas arritjes së marrëveshjes për bashkëqeverisje patën angazhuar grupe punuese për harmonizimin e programit qeverisës, ky program si duket ka mbetur vetëm në sirtar të këtyre partive. Kësisoj analistët politikë po vlerësojnë paradoksale miratimin e qeverisë pa pasur një program qeverisës, shkruan “Tribuna”.

Fisnik Korenica, nga Grupi për Studime Juridike dhe Politike ka thënë se vetë kryeministri Mustafa e ka bërë të qartë se qeveria aktuale nuk ka program dhe pret që një program i tillë ta përfundojë në janar.

Ai vlerëson se është paradoksale që Qeveria të jetë miratuar në Kuvend pa pasur një program qeverisës i cili do të duhej t’i dorëzohej deputetëve në mënyrë që ata të vendosin nëse dëshirojnë ta miratojnë Qeverinë.

E në anën tjetër, analisti Artan Muhaxhiri, ka thënë se mungesa e një programi qeverisës në opinionin publik perceptohet se është një vonesë e cila vjen si pasojë e mosangazhimit serioz në krijimin e këtij programi, sepse, sipas tij, është parë që krijimi i Qeverisë është përcjellë me probleme të shumta, prandaj edhe moskoordinimi i planit është njëri ndër këto probleme. /Telegrafi/