Kosova po humb përkrahjen ekonomike të BE’së

Kosova rrezikon të humbë për të dytën herë me radhë përkrahjen e Bashkimit Evropian për investime në shumë fusha të sektorit ekonomik për shkak të ngërçit politik, raporton KTV.

Në konferencën e Ballkanit Perëndimor të mbajtur më 28 gusht të këtij viti, qeveritë e shteteve të rajonit ishin zotuar se do të përpilonin projekte në transport hekurudhor, rrugor dhe atë energjetik. Por, sipas përfaqësuesve të bizneseve, situata politike do të lërë pasoja të pariparueshme për ekonominë e vendit edhe vitet në vijim.

Ibrahim Rexhepi nga Instituti Stras ka thënë se mosfunksionimi i qeverisë do të humbë një shanse shumë të rëndësishme për të realizuar investime të ndryshme nëpërmes fondeve të BE’së.

Pavarësisht se në momentet e fundit ishte anuluar pjesëmarrja e delegacionit të Kosovës në konferencën e Berlinit, ministri në detyrë i Zhvillimit Ekonomik, Fadil Ismajli, ka thënë të jetë duke u punuar në disa projekte të përbashkëta me shtetet e rajonit.

Ai ka thënë se kushti kryesor i vendosur në Berlin ka qenë që një projekt para se të dërgohet në BE për mbështetje, duhet të ketë miratimin e më së paku dy qeverive.