Shteti nuk ka para për ndërtimin e autostradës për Shkup

Nuk dihet se nga do të financohet gjysma e autostradës Prishtinë – Han i Elezit.Qeveria e Kosovës në tri vitet e ardhshme do t’i investojë vetëm 348 milionë euro në ndërtimin e autostradës, të cilat nuk mjaftojnë për finalizimin e saj, shkruan sot Koha Ditore.

I kanë lënë opsion edhe format e tjera të financimit, por nuk kanë treguar se cilat janë ato. Ekspertët thonë se gabimet e tilla po bëhen në mungesë të studimeve paraprake të fizibilitetit.

Autostrada nga Prishtina në drejtim të Shkupit nuk do të ndërtohet e gjitha nga buxheti i Kosovës. Vetëm 348 milionë euro janë paraparë të investohet në këtë rrugë nga arka e shtetit.

E janë edhe rreth 255 milionë euro që Qeveria nuk ka zgjidhje se prej nga do t’i sigurojë për të kompletuar autostradën deri në kufi me Maqedoninë.