Kundër PROTESTËS dhe FESTËS

Nga Riad Rashiti – Organizimi i qytetarëve të Kosovës nga OPOZITA dhe POZITA për tu përballur në të njëjtin vend, në të njëjtën ditë dhe kohë, është e pamenduar mirë dhe me rrezik jashtëzakonisht të lartë për dhunë të paparashikuar ndër – qytetare.

Nesër Kosova nuk ka nevojë për protestë, por as për festë. Opozita nuk mund dhe nuk do të duhej të protestojë dhe luftojë me çdo mjet kundër zgjedhjes së presidentit të Kosovës, këtë akt nuk ka mundur ta ndalojë as shteti Serb në kohë okupimi.

Ndërsa festa e pozitës, aspak nuk është dashur të organizohet në këtë formë dhe me këtë rrezikshmëri të lartë. Duhej zgjedh koha dhe vendi i përshtatshëm për festë, jo për ballafaqim të qytetarëve, për të rrezikuar ndoshta edhe jetë të pjesëmarrësve në këtë duel aspak të arsyeshëm dhe aspak të nevojshëm.

Sepse opozita nuk ka çka humb nesër, ndërsa pozita po rrezikon shumë, në vend që të vazhdoj rrugën e qeverisjes.

OPOZITË-POZITË nesër do të duhej të protestonin së bashku në Mitrovicë, atje ku nuk funksionon shteti dhe ku mungon lëvizje e lirë e qytetarëve të Kosovës. Ne po kërkojmë liberalizim të vizave, ndërsa nuk mund të lëvizim brenda shtetit tonë.

Bashkimi Kombëtar dhe as shtet formimi i Kosovës nuk mund të bëhet pa tërësinë territoriale të shtetit të Kosovës./rajonipress/