QKMF në Gjilan emërtohet me emrin e Doktor Nagip Rexhepit

Gjilan – Me iniciativë të kryetarit të Komunës, Lutfi Haziri, të propozuar nga doktorët e Gjilanit dhe në mbështetje të Kuvendit të Komunës, sot në vigjilie të tetë vjetorit të Pavarësisë së Kosovës, është bërë emërtimi i Qendrës Kryesore të Mjekësisë Familjare, me emrin e Dr. Nagip Rexhepi, i cili ka dhënë kontributin e madh në fushën e mjekësisë duke bërë punë profesionale në institucione të ndryshme shëndetësore nëpër Kosovë. Me këtë rast, kryetari i Komunës së Gjilanit, Lutfi Haziri, ka thënë se institucionit të shëndetësisë primare i bënë nderë të madh emri i doktor Nagipit.

“QKMF-së i bënë nderë të madh emir i doktor Nagipit. Ishte njeriu që ka dhënë kontribut jashtëzakonisht të madh në sektorin e shëndetësisë. Humanizmi, përkushtimi dhe gatishmëria e tij për të shpëtuar jetë janë elementet të cilat atë e bënë njeri me vlera të larta, ndërsa ne të gjallëve krenar që kishim nga ky qytet një njeri të tillë. Emri i doktor Nagipit do të mbetet sinonim i elementeve të fuqishme pozitive për Gjilanin, si doktor, mikë, baba dhe djalë me virtyte të larta. Ishte ai, i cili ka punuar edhe për pacientet e Prishtinës, Ferizajit, Vitisë, Gjilanit dhe për të gjithë ata që kishin nevojë për dorën dhe ndihmën e tij”, ka thënë ndër të tjerash në fjalën e tij, kryetari i Komunës së Gjilanit.

Ministri i Shëndetësisë, në qeverinë e Republikës së Kosovës, Imet Rrahmani, në fjalën e tij ka vlerësuar lartë kontributin e doktorit të madh siç ishte Nagip Rexhepi.

“Me këtë angazhim dhe përkushtim të institucioneve të Komunës së Gjilanit, që në ballë të Qendrës Kryesore të Mjekësisë Familjare, të qëndroj emir i doktor Nagipit, tregon për kulturën që ka ky qytet në respektimin e njerëzve dhe rrugë e mirë e përkushtimit ndaj vlerave në përgjithësi. Kolegët e mi, në fushën e shëndetësisë, janë të nderuar, ndërsa ky institucion është i nderuar që mbanë emrin e doktorit të madh. Vetë përkrahja politike, dëshmon se Gjilani, din ti respektoj njerëzit si doktori”, ka thënë ndër të tjerash ministri Rrahmani.

Në emër të familjes ka folur edhe vëllau i tij Fatmir Rexhepi, i cili ka thënë se për aq sa do të jetë betimi i hipokratit, aq do të zgjasë edhe emri i doktor Nagipit, në këtë institucion, përmes tij dhe gjithë shëndetësisë. Është moment shumë i mirë që në këtë ceremoni, po kujtohet doktori. Ne si familje falënderojmë të gjitha institucionet komunale që bënë të mundur këtë.

Ndërsa, drejtori i QKMF-së, Fejzulla Berisha, ka thënë se kjo ishte kërkesë e stafit si në QKMF poashtu edhe gjithë mjekëve në sektorin primar dhe sekondar, andaj sipas tij ky është momenti i duhur që në qendër të Gjilanit, pikërisht në QKMF në vigjilje të tetë vjetorit të pavarësisë të kemi këtë ceremoni në emërtimin me emrin e doktor Nagipit./rajonipress/