Krimi nënshtroi edhe Qeverinë “Mustafa”

Sundimi i ligjit, togfjalësh për pushtetarët kosovarë. Prokuroria zotohet se do të bëjë hetime, rezultatet mungojnë.

Qeveria “Mustafa”, njësoj si Qeveria “Thaçi 1 dhe 2” po përfundon e gjunjëzuar para mafisë politike, oligarkisë, para korrupsionit dhe krimit të organizuar, para sfidave të ndershme e të ligjshme për luftimin e korrupsionit e krimit të organizuar, duke përkrahur zhvatjen, plaçkitjen dhe vjedhjen e buxhetit të shtetit.

Në këto kushte kërkohet ndërhyrja e Prokurorisë së Shtetit, e cila nuk e ka të lehtë të zbatojë ligjin pa pastruar më parë vetveten nga njerëzit e dërguar atje nëpërmjet mafisë politike.

Por, edhe në këto rrethana, Kryeprokurori i Shtetit ka paralajmëruar se nuk do të bëhen dallime në hetimin e të inkriminuarve, kushdo qofshin ata. “I siguroj qytetarët se hetimet do të zhvillohen në mënyrë objektive, të plotë dhe të gjithanshme, me qëllim që asnjë fajtor të mos i shmanget përgjegjësisë penale. Në këtë drejtim dua të them se nuk do të lejojmë askënd të jetë viktimë e paragjykimeve, mirëpo ligjshmëria nuk do të braktiset për hir të askujt”, ka thënë Kryeprokurori i Shtetit, Aleksandër Lumezi.

Ndërkaq, nga ana tjetër, opozita kërkon largimin e drejtuesve të kësaj Qeverie të kapitulluar. Ish- kreu i Kuvendit, Jakup Krasniqi ka thënë se këta qeveritarë, që kanë bërë marrëveshje antikushtetuese, që do të reflektojë për breza të tërë, tani janë në ndjekje të deputetëve e të përfaqësuesve të opozitës, prandaj ata nuk e meritojnë besimin tonë. “Atyre u ka mbetur vetëm një rrugë, ajo e dorëheqjes. Nëse dikush duhet të ikë nga Kosova, nuk duhet të ikin qytetarët, por ata që e meritojnë, e t’iu hapin dyert atyre që duan dhe dinë të udhëhiqni me vendin”, ka thënë Krasniqi./kosova sot/