Berisha e do Kupën e Australisë

Besart Berisha vazhdon të jetë protagonist në kampionatin australian me ekipin e tij të Melbourne Victory, teksa të shtunën luan edhe finalen e parë të karrierës së tij, pasi diskutojnë trofeun e kupës ndaj Perth Glory në stadiumin e tyre.

Ai ka shënuar gola të rëndësishëm me ekipin tij e shpreson shumë që të shënojë edhe në finale e në fund të fitojnë trofeun.

“E dimë shumë mirë se kjo është një mundësi ideale për çdo lojtar të skuadrës tonë. Kupa është një trofe i veçantë dhe të gjithë e dëshirojnë. Do të bëjmë lojën tonë për të kënaqur tifozët. Të gjithë në ekip janë të emocionuar dhe dëshirojnë ta çojnë në shtëpi trofeun. I dua shumë këto lloj ndeshjesh dhe premtoj që do të jap maksimumin. Kemi respekt për Perthin, por duhet të japim 100 % kundër tyre”.

Më pas ai shprehet se fakti që luajnë në shtëpi nuk ka shumë rëndësi pasi fitorja vjen nga mënyra se si skuadra do të paraqitet në fushën e blertë shkruan Supersport.

“Nuk ka rëndësi se ku luan. Gjithçka varet nga sjellja e skuadrës në fushë. Ekipi që do të luajë më mirë, do të fitojë. Do të jetë një ndeshje mes dy skuadrave të forta fizikisht dhe mendoj se do të has shumë vështirësi”, ka thënë Berisha.