Miqësorja në rrezik – Shqipëria joshet nga Gjeorgjia

Federata e Futbollit e Shqipërisë (FSHF) ka anuluar 17 nëntorin si termin të rezervuar për të luajtur miqësore në Prishtinë me Përfaqësuesen e Kosovës. Lajmi është bërë i ditur të martën nga zyrtarët e Federatës së Futbollit të Kosovës (FFK).

Sipas njoftimit të FFK-së, FSHF-ja ka kërkuar që ndeshja me Kosovën të luhet më 13 nëntor, pasi pak ditë më vonë do të zhvillojë një tjetër ndeshje miqësore në Elbasan – kundër Gjeorgjisë, shkruan sot “Koha Ditore”.

Por, për Kosovën ky ndryshim termini mund të bëjë që ndeshja të mos luhet fare. Kjo pasi çdo kundërshtar dhe çdo termin për ndeshjet e Kosovës në terren vendas, duhet të aprovohet nga FIFA, duke i nisur asaj shkresë 21 ditë para ndeshjes.

Sipas FFK-së, Kosova i kishte nisur FIFA-s shkresë 21 ditë para 17 nëntorit, kur fillimisht ishte paraparë ndeshja me Shqipërinë, e quajtur ndryshe edhe festive për kualifikimin e Shqipërisë në Evropian.

Për kërkesën e FSHF-së për ndërrim termini, të martën, ka diskutuar Komiteti Ekzekutiv i FFK-së dhe më pas ka nisur një komunikatë, ku mes rreshtash i është hedhur faji Tiranës për çdo dështim të mundshëm.

FFK-ja ndërkohë po pret përgjigjen nga FIFA nëse mund të luajë më 13 nëntor, ashtu siç ka kërkuar FSHF-ja.

http://koha.net/?id=6&l=82672