Mustafa: Ata që gati e dogjën Kosovën për demarkacionin, sot dalin kundër matjes së territorit

Kryeministri i vendit Isa Mustafa ka theksuar se pikërisht ata që kundërshtonin demarkacionin me Malin e Zi tani po dalin kundër matjes së territorit.

Mustafa ka theksuar se tani shtrohet pyetja se si e matën ata Kosovën (pa kufij) për të akuzuar se po humb territor, nëse kjo qenka e mundur të bëhet, shkruan Indeksonline.

Sipas Mustafës pikërisht këta po i bëjnë një dëm të madh sovranitetit shtetëror të Kosovës.

Ky është statusi i plotë:

Qytetarë të nderuar, Ata që trumbetonin dhe gati e dogjën Kosovën se po humbim mbi 8 mijë hektarë nga shënimi i vijës kufitare me Malin e Zi, sot po dalin kundër matjes së territorit, sepse sipas tyre Kosova nuk ka kufij. Shtrohet pyetja se si e matën ata Kosovën (pa kufij) për të akuzuar se po humb territor, nëse kjo matje nuk qenka e mundur të bëhet. Kosova i ka kufijtë e trashëguar, prandaj të ashtuquajturit ekspertë të gënjeshtrave dhe zëdhënës të kauzës së rrejshme politike janë sfiduar dhe kanë ardhur ngushtë me iniciativën për matjen e territorit të Kosovës. Këta po ia bëjnë një dëm të madh sovranitetit shtetëror të Kosovës! IM