Nis zyrtarisht projekti për ndarjen e mbeturinave “Gjilani Riciklon”

Gjilan – Komuna e Gjilanit në bashkëpunim me Organizatën Gjermane për Bashkëpunim Ndërkombëtar (GIZ), ka filluar sot zyrtarisht realizmin e projektit “Gjilani Riciklon”, i cili është mbajtur në shkollën fillore “Selami Hallaqi”.

Fillimisht “Klubi i Gjelbërt” i nxënësve të kësaj shkolleje kanë demonstruar ndarjen e mbeturinave sikurse edhe zëvendësimin e qeseve me çanta, të cilat nxënësit i kanë punuar aty për aty me rroba të trupit.

Hapjen zyrtare të këtij projekti e ka bërë kryetari i Komunës, Lutfi Haziri, i cili ka thënë se me fillimin e projektit, Gjilani hynë në qytetet e para që të jetë qyteti pastërt dhe i gjelbërt.

“Programi i nisur në këtë shkollë për ndarjen e mbeturinave do të vazhdohet të implementohet në tërë territorin e Komunës së Gjilanit, në mënyrë që institucionet dhe objektet ku mund të fillojnë ta aplikojnë programin, të jetë i pranueshëm dhe të jetë pjesë e kulturës sonë”, tha Haziri.

“Synim yni është që ta kthejmë jo vetëm ambientin dhe oborret shkollave dhe institucioneve tona publike në ambiente të gjelbërta e të pastërta, por këtë kulturë ta bartim në lagjet tona e në qytet dhe Gjilani hynë në qytetet e para që të jetë qyteti pastërt dhe i gjelbërt”, shtoi ai.

Ai tha se Gjilani është shpallur nga GIZ-i gjerman qyteti me hapësirë të gjelbërt më të madhe në territorin e Kosovës, ndërkaq ka shtuar se do të vazhdohet me logjikën e ndërtimit, zgjerimin dhe kujdesin e hapësirave të gjelbërta.

Nga ana e tij, Driton Vatovci përfaqësues i organizatës GIZ, tha se është kënaqësi të punohet me Komunën e Gjilanit, duke përgëzuar për nisjen e këtij projekti, i cili shërben për brezat e rinj se si të ndahen dhe riciklohen mbeturinat për një mjedis më të pastër.

Përveç Komunës së Gjilanit dhe GIZ-it, në implementim të këtij projekti është e përfshirë edhe “Ecohigjiena”, OJQ “Green Art Center” si dhe kompania private “Riciklimi”./rajonipress/