Gagica: Për 20 muaj qeverisje, u arritën objektivat katër vjeçare të Administratës së Përgjithshme

Gjilan – Në konferencën për media, të mbajtur sot nga drejtori i Drejtorisë së Administratës së Përgjithshme, Nazim Gagica, janë prezantuar punët për nëntë mujorin e këtij viti, i cili, karakterizohet me rritje të cilësisë në dhënie të shërbimeve, modernizim të administratës përmes projekteve të ndryshme, si implementimi i projektit “tele – work”, që deri më tani është treguar shumë i suksesshëm dhe gjatë muajit në vijim do të implementohet edhe projekti tjetër i “E-kiosqeve”, që kur shtohen edhe projekti për zyre të hapura dhe shërbime online i realizuar gjatë vitit të kaluar, dëshmon për efikasitet të plotë në këtë drejtori.

Me këtë rast drejtori i kësaj drejtorie, Nazim Gagica, ka thënë se në drejtorinë e tij ka rritje të cilësisë së shërbimeve për çdo ditë pune, sikur që është edhe realizimi i projekteve të planifikuara në funksion të përmirësimit të shërbimeve për qytetarë.

“Nëntë muaj të këtij viti karakterizohen me rritje të cilësisë dhe efikasitetit në dhënien e shërbimeve ndaj qytetarëve. Gjatë kësaj periudhe kemi realizuar projektin “tele – work”, që është në kuadër të punës në distancë të zyrtarëve komunal. Deri më tani prej të gjitha matjeve që kemi bërë ka dalë të jetë projekt i suksesshëm, ngase ka mundësuar efikasitet në punë”, tha drejtori Gagica.

Gagica ka bërë publik edhe lajmin për fillimin e projektit për “E-kiosqet”, që është në funksion të dhënies së shërbimeve të drejtpërdrejta për qytetarët e Gjilanit.

“Gjatë ditës së sotme do të bëhet nënshkrimi i kontratës për “E-kiosqet” dhe nga dita e nënshkrimit të kontratës brenda 20 ditëve të ardhshme do të bëhet funksionalizimi i plotë i tyre. Janë të paraparë të vendosen tri “E-kiosqe”, dy në qendër të qytetit dhe një tjetër në lagjen “Dardania”. Shërbimet që ofrohen janë certifikatat e Gjendjes Civile, duke mundësuar që qytetari të zgjedh vet cilin shërbim e dëshiron, cfarë lloj të certifikatës etj, të cilat i ofrohen në origjinal, duke mundësuar kështu vulosjen e dokumentit dhe kryerjen e pagesës në të njëjtën kohë”, ka thënë Nazim Gagica, duke shtuar se dokumentet e lëshuara nga këto “E-kiosqe”, janë të validitetit të plotë.

Drejtori i Administratës, ka pohuar se ka rritje të efikasitetit në Qendrën për Shërbim të Qytetarëve dhe deri më tani kemi 96 % në dhënie të përgjigjeve dhe mbylljen e lëndëve deri në këtë periudhë.

Ai theksoi se edhe sa i përket shfrytëzimit të veturave zyrtare, ka përmirësime të dukshme në këtë sektor dhe ulje të shpenzimeve përditë e më shumë dhe rritje të shërbimeve në të njëjtën kohë.

“Në sektorin e autoparkut krahasimi i periudhës së njëjtë të këtij viti me vitin paraprak, pra me vetveten është për 5 mijë litra derivate më pak të harxhuara, por krahasuar me vitin 2013 është 15 mijë litra më pak, që dëshmon kujdesin dhe përkushtimin që kemi në ruajtjen e parasë publike dhe uljen e shpenzimeve të luksit”, ka thënë drejtori i Administratës së Përgjithshme, Nazim Gagica.

Siç ka potencuar ai, për vetëm 20 muaj të qeverisjes, është arritur që të realizohen objektivat e parapara të kësaj Drejtorie.

“Kjo është arritur falë angazhimit të stafit dhe mbështetjes së fuqishme të kryetarit Lutfi Haziri, tash do të vazhdojmë tutje, modernizimin e arkivës dhe hapësirën shtesë për arkivën e të gjitha dokumenteve të drejtorive komunale”, tha ai.

Drejtori i Administratës ka informuar se gjatë kësaj jave do të bëhet edhe hapja e sallës së re të Kuvendit të Komunës, e cila është adekuate për mbledhje të Kuvendit./rajonipress/