Nga polici në yll futbolli

Mërgim Mavraj është një futbollist i madh, ndër më meritorët në kualifikimin e Shqipërisë në Kampionatin Evropian “Franca 2016”. Por, mbrojtësi kosovar sot ka mundur ta kryente një punë tjetër sikur të mos fillonte të merrej me futboll. 29-vjeçari ka zbuluar se kur ishte i ri kishte menduar të bëhej polic, pasi i pëlqente ky profesion. Madje, këtë dëshirë e kishte edhe babai i tij i ndjerë, i cili ndërroi jetë para disa muajve.

Mirëpo, në fund Mërgimi kishte shkëlqyer dhe kishte vendosur ta çonte një jetë me futbollin, të cilin e donte aq shumë. “Kisha një dëshirë të isha autoritar dhe të kërkoja të drejtat dhe rend”, ka thënë Mavraj. Si 16-vjeçar për një kohë ai ishte praktikant në Policinë gjermane, si vëzhgues nga Stacioni Policor i Muhlheim, pranë Hanau-t.

“Nëse nuk do të kisha shkëlqyer në futboll do të bëhesha me siguri një polic i suksesshëm”, ka rrëfyer ai.

Gjithçka u sqarua në vitin 2004 kur pikërisht pak përpara provimeve të maturës ai firmosi për skuadrën e të rinjve të Darmstadt-it, që militonte në Regionalliga, kategori e tretë në Gjermani.

Pasi i kishte mbushur 25 vjet, Mavraj ishte në fokus të Gjermanisë dhe Shqipërisë. Kishte marrë telefonata nga të dyja palët. Shqipërinë fillimisht e kishte refuzuar, për çka tifozët e thërrisnin “tradhtar”. Por, kuqezinjtë nuk ishin dorëzuar, derisa Mavraj pranoi ftesën kuqezi, ndërsa tani ndihet tepër i lumtur në Kombëtaren Shqiptare, me të cilën do ta nisë një kapitull të ri gjatë verës së ardhshme, kur do të luajë në “Euro 2016”./zeri/