Dekriminalizimi, i bllokuar nga PDK-LDK

Institucionet shtetërore të inkriminuara.Lidershipi kosovar i painteresuar për pastrimin e shtetit nga krimi

“Këto dy subjekte politike po synojnë që t’i ruajnë strukturat e veta të inkriminuara deri në zgjedhjet e reja, që të jenë aktive në manipulimin e procesit dhe rihapjen e shtetit, gjë që është tepër skenar i rrezikshëm dhe i dëmshëm për qytetarin e zakonshëm dhe perspektivën e tij në pritje për ndryshime”, tha Riza Smaka për “Kosova Sot”

Procesi i dekriminalizimit të shtetit dhe politikës është lënë në harresë pas tensioneve të fundit në Kuvendin e Kosovës. Njohësit e sundimit të ligjit dhe analistët politikë e shohin si një zhvillim tepër të dëmshëm lënien pas dore të dekriminalizimit të institucioneve.

Sipas tyre, një gjë e tillë iu konvenon kryesisht partive në pushtet, të cilat do të provojnë ta ruajnë këtë gjendje deri në zgjedhjet e radhës, për të pasur në dispozicion strukturat e kriminalizuara për kapjen më të lehtë të institucioneve të shtetit nga mafio-politika.”Kosova prej pasluftës ka mbetur peng i kriminelëve, hajnave, banditëve, servilëve, uzurpatorëve, dallaveraxhinjve, mashtruesve, profiterëve dhe të korruptuarve të politikës dhe parapolitikës. Edhe sikur të mos kishim këtë krizë politike, dekriminalizimi i pushtetit nuk do të ndodhte kurrë, sepse pushteti dhe skena politike është në duart e atyre që do të duhej të largoheshin nga skena politike dhe të burgoseshin për krimet e tyre. Prandaj, është vështirë të ndodhë dekriminalizimi i pushtetit dhe institucioneve shtetërore”, tha analisti politik, Faik Krasniqi, për “Kosova Sot”.