Opozita: Thirrja e seancës, provokim për neve

Tri partitë opozitare AAK, Vetëvendosje dhe Nisma kanë dalë me një deklaratë të përbashkët ku kundërshtojnë vendimin që të premten të mbahet seanca e Kuvendit të Kosovës.

“Në kohën kur Qeveria e Kosovës me marrëveshjet e veta që e rrënojnë dhe falimentojnë Republikën e ka sjellë vendin në një situatë të jashtëzakonshme, insistimi i vazhdueshëm në mbajtjen e seancave të rregullta plenare nga koalicioni është tentim kontrabandimi i normalizimit të ‘Zajednicës’ dhe faljes së tokave të Kosovës Malit të Zi. Thirrja e seancës dhe insistimi që ajo të mbahet do ta përshkallëzojë tutje situatën”, thuhet në një deklaratë të përbashkët të këtyre tri partive.

“Seanca e ardhme është caktuar të mbahet në mbrëmje, nga ora 16 të premten. Ky vendim i Kryesisë së Kuvendit më së miri e paraqet punën e koalicionit qeverisës, dhe e Kryetarit të Kuvendit: ata punojnë natën, sa më larg syve të publikut, në kundërshtim të plotë me praktikat e deritashme parlamentare. Ashtu siç i kanë arritur marrëveshjet fshehtas, tash po duan t’i përvjedhin at o me këto seancat të natës”, thuhet në deklaratë.

Partitë opozitare këmbëngulin se nuk do të ketë vazhdim të seancës për sa kohë që nuk ka tërheqje nga marrëveshjet.

“Protestën nuk do ta ndalim pavarësisht se në çfarë ore mbahet seanca dhe sa kërcënuese është policia e pushtetit. Qeveria e ka sjellë këtë situatë jashtëzakonshmërie në Kosovë”.

“Ne si deputetë të Opozitës as nuk do të zbrapsemi e as nuk do të pushojmë deri sa të tërhiqen marrëveshjet që e cungojnë Republikën dhe territorin e saj”, thuhet në deklaratë. /Telegrafi/