Anarki për t’i shpëtuar Speciales

Prapaskenat e bllokadës parlamentare. Disa prej politikanëve protagonistë mund të akuzohen për krime.

“Anarkia po ashtu do të krijonte situatën kur nuk mund të finalizohet Gjykata Speciale. Disa jetojnë me shpresë se anarkia mund të jetë shpëtimi i tyre nga drejtësia. Kosova akoma është peng i lëkurës së kapove të krimit”, tha deputeti Adem Salihaj për “Kosova Sot”

Një nga arsyet, e pathënë publikisht, për këtë krizë politike që po vuan vendi, sipas analistëve, mund të jetë edhe improvizimi i paramenduar i vetë liderëve politikë që t’i nxjerrin jashtë funksioni të gjitha institucionet e shtetit, për të shpëtuar veten sa më gjatë nga Gjykata Speciale, e cila pritet të akuzojë disa nga ish-drejtuesit e UÇK-së, që sot kryesisht janë pjesë e PDK-së. “Anarkia është e gatshme dhe duket se ka shkuar kohë e gjatë pa eskaluar situata. Qeveria me pozicionin e saj duket se është kundër anarkisë dhe është në gjendje të marrë masa të dhunshme, por e vërteta qëndron te gjendja e padurueshme ekonomike e sociale, të cilën po e intensifikon gjithnjë e më shumë vetë Qeveria me papërgjegjësinë e saj. Qeveria po ndërmerr veprime provokuese, siç ishte rasti i marrëveshjes për demarkacionin me Malin e Zi, me qëllim që të nxisë reagime”, tha analisti politik, Isa Mulaj. Sipas tij, opozita dhe qytetarët nuk kanë se si t’i shmangin këto provokime të dëmshme, përveç të reagojnë me forcë.“Në këtë mënyrë Qeveria e gjuan gurin dhe fsheh dorën, do të thotë duke u bërë shkaktar i trazirave të dhunshme, e në anën tjetër zotohet se nuk do të lejojë skenarin e trazirave si në Shqipëri më 1997”, tha ai..kosova sot/