Ragip Xhaka: “Jam babai më krenar në botë”

Me dy djemtë e tij, Granitin dhe Taulantin, që luajnë në dy kombëtare të ndryshme, të dyja të kualifikuara për Kampionatin Evropian, babai, Ragip Xhaka nuk mund të kërkojë më shumë nga jeta.

Graniti luan për Zvicrën, shtetin i cili për Ragipin është bërë atdheu i dytë ndërsa Taulanti për Shqipërinë, vendin ku janë rrënjët e tij.

“Nganjëherë nuk besoj as vetë se çfarë po ndodh”, thotë për blick.ch Ragipi i ekzaltuar me suksesin dy djemve të tij. “Jam babai më krenar në botë”, transmeton albinfo.ch.

Para 25 vitesh Ragip Xhaka së bashku me të shoqen, Elin, ka ardhur si refugjat politik në Zvicër. Ai punonte në kopshtari, ajo pastronte. Asnjëherë në atë kohë nuk kishin mundur të imagjinonin atë që po u ndodh sot. Që dy djemtë e tyre të bëhen yje të adhuruar futbolli, siç janë bërë sot. Dhe se të dy do të kenë merita të mëdha për kualifikimin në Evropian të të dy vendeve.

Por a do të ndodhë që në kampionat të luajnë dy “kombëtaret e djemve të tij” mes vete? Ragipi shpreson se nuk do të ndodhë. “Por nëse ndodhë, unë do të jem neutral”./albinfo/