Kosova dhe Berisha dëshirojnë fitore

Mbrojtësi i Përfaqësueses së Kosovës, Ilir Berisha, ka folur para ndeshjes kundër Guinesë Ekuadoriale, ndërsa ka kërkuar nga bashkëlojtarët që të kërkojnë fitoren.Kosova do të luaj pas një viti ndeshje kundër një kombëtareje dhe fitoja është shumë e rëndësishme për të besuarit e Albert Bunjakit.

Berisha që luan në Suedi me Geflen, në një intervistë për Telegrafin, flet për rëndësinë e ndeshjes dhe dëshirën për fitore.

“Ka me qenë një përvojë tjetër e re, pasi tani e tutje po takohemi edhe më shpesh me shokët e Përfaqësueses dhe mund ta njohim njëri-tjetrin edhe më afër si nga personaliteti ashtu edhe nga mënyra profesionale e futbollit”.

“Është ndeshje interesante për dallim nga hera e kaluar ku nuk kemi pasur ndeshje, por kemi stërvitur dhe ajo na ka shërbyer shumë”.

“Kësaj radhe do të jetë më ndryshe pasi do të luajmë ndeshje dhe kjo është një gjë e mirë për ne. Sa i përket kundërshtarit personalisht kam pak njohuri pasi kam shikuar vetë disa video në internet”.

“Kundërshtari ka disa lojtarë që luajnë nëpër ligat e ndryshme evropiane dhe ne e respektojmë, por në ndeshje futemi me të vetmin qëllim fitoren”, deklaroi mbrojtësi kosovar Ilir Berisha për Telegrafin.