Kuvendit i doli tymi

Seanca plenare e së enjtes ishte më dramatikja që ka ndodhur në 15 vjetët e pasluftës në Kosovë. Për herë të parë Kuvendit të Kosovës i doli tymi, u alivanosën dy deputete, ndërsa acarimi brenda dy taborëve, mazhorancës dhe opozitës, sa nuk e arriti vlimin, që hesapet të zgjidhen përmes grushteve.

Ishin deputetët opozitarë, të cilët për ta bllokuar punën e Parlamentit nuk kursyen gazin lotsjellës brenda sallës.

Por, nuk ishte vetëm gazi që e bëri dramatike seancën, pasi që opozitarët përdorën gjatë gjithë kohës arsenalin e tyre, bilbilat (filikaqet), vezët dhe ujin vetëm për ta bllokuar funksionimin e Parlamentit. Arsyeja e rebelimit të opozitës, mbetet e njëjtë, që kryeministri Isa Mustafa ta heqë nënshkrimin nga dy marrëveshjet e fundit, njërën me Serbinë për “Zajednicën” siç e quan opozita, dhe atë për Demarkacionin e kufirit me Malin e Zi.

Situata eskaloi deri në atë masë saqë deputetët nuk kursyen as sharjet “me nënë e babë”. Por, në një seancë të tillë të jashtëzakonshme ishte kryetari i Kuvendit, Kadri Veseli, ai i cili ia “hodhi” topin nënkryetarit dhe bashkëpartiakut të tij, Xhavit Haliti, për ta drejtuar seancën nga ulësja e deputetit të GP të PDK-së, derisa vetë qëndronte në krye të vendit si spektator.

Ai nuk respektoi Rregulloren e Punës së Kuvendit, e cila obligon sigurimin e kushteve për mbarëvajtjen e punimeve të seancës, duke i bërë “kurban” deputetët, të cilët gati sa nuk u përleshën fizikisht në momentet kur kontrabandoheshin projektligjet./zeri/