Shoferi i Begzad Sinanit fyen dhe kërcënon përfaqësuesit e OJQ “Fortesa”

Kamenicë – Përmes një deklarate për mediat, OJQ “Fortesa” thekson se sot paradite përfaqësuesit e saj janë fyer dhe kërcënuar nga shoferi i kryetarit të Kamenicës, Begzad Sinani. Sipas kësaj organizate, kërcënimi ka ardhur për shkak të publikimit të një reagimi të organizatës në numrin e sotëm të gazetës “Koha Ditore” në lidhje me ndarjen e banesave kolektive.

“Derisa drejtoresha e OJQ “Fortesa”, Sanije Jahiri dhe monitoruesi Amir Jakupi po sqaroheshin me një pjesëtar të FSK-së në lidhje me qëndrimin e organizatës të mbajtur rreth ndarjes së banesave, shoferi i kryetarit Begzad Sinani, vjen në tavolinë fyen dhe kërcënon përfaqësuesit e organizatës”, thuhet në reagim.

“Fortesa” e ka cilësuar si qyqar këtë kërcënim dhe ka kërkuar nga organet e rendit ta sjellin para drejtësisë personin në fjalë dhe të gjithë ata që nxisin akte dhune.
“Sjelljet e tilla, nga kushdo qoftë, janë tentim për tua mbyllur gojën medieve dhe organizatave joqeveritare, njëkohësisht janë të dëmshme për demokracinë dhe imazhin e institucioneve komunale”.

“Rrugaçët, analfabetët e banditët nuk do të arrijnë të na e mbyllin gojën, përkundrazi do të na nxisin edhe më tepër në betejën tonë për ta denoncuar çdo keqpërdorim dhe rast korruptiv në institucionet e Komunës”.

OJQ “Fortesa” inkurajon mediat, por edhe OJQ-të e tjera që të kenë kurajo dhe guxim për të denoncuar dhe luftuar, që të kemi institucione të pastra dhe të përgjegjshme. /rajonipress/