Policia e Gjilanit zhvillon ligjërata vetëdijesuese në shkolla për sigurinë në trafik dhe parandalimin e dhunës

Gjilan – Policia e Kosovës ka realizuar aktivitete edukative dhe vetëdijesuese në dy institucione arsimore të rajonit të Gjilanit, me qëllim informimin e nxënësve për sigurinë në komunikacionin rrugor, parandalimin e dhunës ndërmjet bashkëmoshatarëve dhe pasojat ligjore të sjelljeve të kundërligjshme.

Gjilan – Njësia për Sektor dhe Komunitet e Stacionit Policor në Gjilan ka mbajtur ligjërata vetëdijesuese në shkollën “Don Bosko” në Gjilan dhe në shkollën fillore “Skënderbeu” në fshatin Përlepnicë.

Në shkollën “Don Bosko”, ligjërata u zhvillua me nxënësit e klasave të dyta, ku tema kryesore ishte “Siguria në komunikacionin rrugor”. Përmes këtij aktiviteti, nxënësit u informuan për rëndësinë e respektimit të rregullave të trafikut dhe kujdesin që duhet të tregojnë si pjesëmarrës në komunikacion.

Ndërkaq, në shkollën fillore “Skënderbeu” në Përlepnicë, ligjërata iu dedikua nxënësve të klasave të nënta, me temën “Parandalimi i dhunës ndaj bashkëmoshatarëve dhe masat ligjore ndaj të miturve”.

Gjatë këtij takimi u trajtuan çështje që lidhen me parandalimin e dhunës, përgjegjësinë individuale dhe pasojat ligjore që mund të rrjedhin nga veprimet e kundërligjshme.

Sipas Policisë Rajonale në Gjilan, këto aktivitete kanë për qëllim forcimin e bashkëpunimit me institucionet arsimore, promovimin e kulturës së sigurisë dhe parandalimin e dukurive negative në mesin e të rinjve.

Policia ka bërë të ditur se aktivitetet e tilla vetëdijesuese do të kontribuojnë në krijimin e një mjedisi më të sigurt për nxënësit dhe në rritjen e përgjegjësisë qytetare që në moshë të hershme./rajonipress/