Dardanapress organizon trajnim për barazinë gjinore, të drejtat e njeriut dhe parandalimin e diskriminimit

Kamenicë – Organizata Joqeveritare Dardanapress ka organizuar trajnimin me temën “Barazia gjinore, të drejtat e njeriut dhe parandalimi i diskriminimit”, me synim fuqizimin e grave, vajzave dhe të rinjve, si dhe rritjen e pjesëmarrjes së tyre në proceset vendimmarrëse dhe në jetën publike.

Trajnimi është mbajtur në kuadër të projektit “Barazia Fillon me Edukimin – Fuqizimi i Grave dhe të Rinjve për një Shoqëri të Barabartë”, përmes të cilit synohet avancimi i njohurive dhe aftësive të pjesëmarrësve në fushën e barazisë gjinore, të drejtave të njeriut dhe parandalimit të diskriminimit.

Gjatë aktivitetit janë trajtuar çështje që lidhen me barazinë gjinore, fuqizimin dhe përfaqësimin e grave në institucionet publike, si dhe rëndësinë e përfshirjes së vajzave dhe të rinjve në promovimin e një shoqërie gjithëpërfshirëse.

Vëmendje e veçantë i është kushtuar edhe zhvillimit të aftësive praktike në komunikim, lidership, vendimmarrje dhe pjesëmarrje qytetare.

Në mesin e diskutimeve, Nazmije Demolli-Kastrati, koordinatore e NJKDNJ-së dhe zyrtare për Mbrojtje nga Diskriminimi, ka folur për rëndësinë e respektimit të të drejtave të njeriut dhe krijimit të mundësive të barabarta për të gjithë qytetarët.

Duke ndarë përvojat nga puna në nivel lokal në Komunën e Kamenicës, ajo ka theksuar nevojën për fuqizimin e rolit të grave në proceset vendimmarrëse, mbrojtjen e kategorive më të cenueshme dhe forcimin e bashkëpunimit ndërinstitucional.

Përmes diskutimeve dhe shkëmbimit të përvojave, pjesëmarrësit kanë pasur mundësi të thellojnë njohuritë mbi të drejtat dhe përgjegjësitë qytetare, përfaqësimin e barabartë dhe mekanizmat konkretë të përfshirjes në vendimmarrje.

Rekomandime për më shumë barazi dhe gjithëpërfshirje

Në përfundim të trajnimit janë nxjerrë disa rekomandime, ndër të cilat promovimi i barazisë gjinore në të gjitha nivelet e shoqërisë, rritja e pjesëmarrjes së grave dhe të rinjve në vendimmarrjen lokale, krijimi i mundësive për përfaqësimin e grave në institucionet publike dhe organizimi i aktiviteteve vetëdijesuese kundër diskriminimit.

Po ashtu, është theksuar rëndësia e zhvillimit të aftësive të lidershipit dhe aktivizmit qytetar, si dhe forcimi i bashkëpunimit ndërmjet qytetarëve dhe institucioneve.

Projekti “Barazia Fillon me Edukimin – Fuqizimi i Grave dhe të Rinjve për një Shoqëri të Barabartë” financohet nga Zyra e Presidentes së Republikës së Kosovës.

Përmes këtij projekti, Dardanapress synon të kontribuojë në fuqizimin e grave dhe të rinjve, rritjen e vetëdijes qytetare dhe ndërtimin e një shoqërie ku barazia, respektimi i të drejtave të njeriut dhe mosdiskriminimi zbatohen edhe në praktikë./rajonipress/