Qahil Halili me fjalë prekëse i jep lamtumirën e fundit Mehmet Rrustemit: Zhegra humbi një njeri të mirë dhe një aktivist të përkushtuar

Gjilan – Kryetari i Këshillit të Fshatit Zhegër, Qahil Halili, ka shprehur dhimbjen dhe pikëllimin për ndarjen e parakohshme nga jeta të Mehmet Rrustemit, duke e kujtuar atë si një familjar shembullor, aktivist të dëshmuar dhe bashkëfshatar me vlera të larta njerëzore.

Në ceremoninë e varrimit, Halili, në emër të komunitetit të Zhegërës, ka përcjellë një mesazh ngushëllimi dhe mirënjohjeje për jetën dhe veprën e të ndjerit, duke vënë në pah respektin që Mehmeti kishte ndërtuar përmes angazhimit, karakterit dhe sjelljes së tij.

Ai e përshkroi Rrustemin si një njeri të përkushtuar, të respektueshëm dhe të fjalës së mbajtur, i cili, pavarësisht moshës së re, arriti të lërë gjurmë të rëndësishme në familje dhe në komunitetin ku jetoi.

Sipas Halilit, madhështia e një njeriu nuk matet me vitet që jeton, por me vlerat, veprat dhe kujtimet që lë pas. Pikërisht këto cilësi, sipas tij, do ta bëjnë Mehmet Rrustemin të paharruar për familjarët, miqtë dhe bashkëfshatarët.

Në mesazhin e tij të lamtumirës, kryetari i Këshillit të Fshatit Zhegër ka shprehur ngushëllimet më të sinqerta për familjen Rrustemi dhe të gjithë të afërmit, duke e përcjellë të ndjerin me lutjen që Zoti ta shpërblejë me Xhenet.

Njerëzit e mirë mund të largohen herët nga kjo jetë, por gjurmët e tyre mbeten gjatë në kujtesën dhe ndërgjegjen e komunitetit./rajonipress/