PDK në Gjilan kundërshton mbylljen e ambulancës në Kishnapolë: Banorët meritojnë shërbime shëndetësore, jo braktisje

Gjilan – Partia Demokratike e Kosovës (PDK), Dega në Gjilan, ka shprehur kundërshtimin ndaj vendimit të Drejtorisë së Shëndetësisë dhe Mirëqenies Sociale për ndërprerjen e shërbimeve shëndetësore në ambulancën e fshatit Kishnapolë, vendim që ka hyrë në fuqi më 2 nëntor 2026.

Përmes një reagimi publik, PDK-ja vlerëson se ky vendim rëndon qasjen e banorëve në shërbimet shëndetësore, pasi qytetarët e Kishnapolës dhe të fshatrave përreth do të detyrohen që për trajtim mjekësor të drejtohen në Qendrën e Mjekësisë Familjare në Bresalc.

Sipas PDK-së, ndërprerja e shërbimeve nuk përbën zgjidhje për problemet e organizimit dhe menaxhimit të shëndetësisë, ndërsa institucionet komunale kanë përgjegjësi të sigurojnë personelin dhe kushtet e nevojshme për funksionimin e ambulancave, veçanërisht në zonat rurale, ku qasja në kujdesin shëndetësor është më e vështirë.

Partia ka ngritur shqetësime edhe për mungesën e një arsyetimi të plotë në njoftimin zyrtar të Drejtorisë së Shëndetësisë, si dhe për faktin se nuk është përcaktuar ndonjë afat për rikthimin e ambulancës në funksion.

Në këtë kontekst, PDK-ja kërkon nga Drejtoria e Shëndetësisë dhe Mirëqenies Sociale publikimin e arsyeve të plota që kanë çuar në ndërprerjen e shërbimeve, ndërmarrjen e masave për rihapjen sa më të shpejtë të ambulancës dhe përcaktimin e një afati konkret për rifillimin e punës.

Gjithashtu, kjo parti i ka bërë thirrje kryetarit të Komunës së Gjilanit që të angazhohet drejtpërdrejt për zgjidhjen e situatës dhe të marrë përgjegjësinë institucionale për garantimin e shërbimeve shëndetësore për banorët e kësaj ane.

Në reagimin e saj, PDK-ja thekson se banorët e Kishnapolës nuk duhet të bartin pasojat e problemeve të menaxhimit institucional, duke kërkuar që shërbimet shëndetësore të jenë të qasshme dhe funksionale për të gjithë qytetarët, pa dallim të vendbanimit.

Partia Demokratike e Kosovës, Dega në Gjilan, ka bërë të ditur se do ta përcjellë këtë çështje dhe do të kërkojë llogaridhënie nga institucionet përgjegjëse deri në gjetjen e një zgjidhjeje konkrete./rajonipress/