Parashikohen ndryshime në buxhetin 2026: 102 milionë euro për pagën e 13-të dhe përvojën e punës, 20 milionë për pensionistët

Një projektligj për ndryshimin dhe plotësimin e ligjit për ndarjet buxhetore për vitin 2026 parasheh ndarjen e mjeteve për pagën e 13-të, kompensimin retroaktiv të përvojës së punës dhe mbulimin e kostos së pensioneve bazike.

Sipas tekstit të projektligjit, në Ministrinë e Financave parashihet të shtohen 102 milionë euro në kategorinë e shpenzimeve “Paga dhe shtesa”. Këto mjete do të shërbejnë për mbulimin e kostos së pagës së 13-të dhe pagesën retroaktive të përvojës së punës, në pajtim me aktgjykimin KO79/23 të Gjykatës Kushtetuese.

Projektligji parasheh gjithashtu ndarjen e 20 milionë eurove shtesë për Ministrinë e Punës, Familjes dhe Vlerave të Luftës Çlirimtare, përkatësisht për Departamentin e Pensioneve, me qëllim të mbulimit të kostos së pensioneve bazike.

Një tjetër pikë e rëndësishme e këtij projektligji është autorizimi që i jepet qeverisë për të kërkuar shpërndarjen e dividendës nga ndërmarrjet publike, deri në vlerën prej 30 milionë eurosh, për të siguruar financimin e nevojave buxhetore.

Sipas dispozitave të propozuara, mjetet nga dividenda duhet të transferohen në llogarinë e vetme të Thesarit brenda 30-ditësh nga hyrja në fuqi e ligjit.

Teksti parasheh që qeveria, me propozim të ministrit të Financave, të mund të miratojë kompensimin retroaktiv të përvojës së punës për punonjësit që paguhen nga buxheti i Kosovës, në përputhje me aktgjykimin përkatës të Gjykatës Kushtetuese.

Projektligji parasheh edhe përditësimin e tabelave buxhetore përkatëse, ndërsa hyrja në fuqi do të bëhet në ditën e publikimit në Gazetën Zyrtare të Republikës së Kosovës.