Behgjet Pacolli dëshmon për rreth 7 orë në SPAK për çështjen e Aeroportit të Vlorës

Behgjet Pacolli ka njoftuar se është paraqitur për rreth shtatë orë para Prokurorisë së Posaçme kundër Korrupsionit dhe Krimit të Organizuar (SPAK) në Shqipëri, ku ka dorëzuar fakte dhe dokumente lidhur me çështjen e Aeroportit Ndërkombëtar të Vlorës.

Përmes një deklarate publike, Pacolli bëri të ditur se gjatë paraqitjes së tij ka shpjeguar në mënyrë të detajuar rrethanat që, sipas tij, lidhen me zhvillimet rreth aeroportit, duke ngritur pretendime për ndërhyrje të paligjshme në strukturën e pronësisë, mosrespektim të vendimeve gjyqësore dhe cenim të pronës private.

Ai u shpreh se e vlerëson mundësinë për t’i paraqitur pretendimet dhe dokumentacionin përkatës para organit kompetent, duke shprehur besimin se institucionet e drejtësisë do ta trajtojnë çështjen në mënyrë të pavarur dhe në përputhje me ligjin.

“Ne do të vazhdojmë të bashkëpunojmë plotësisht me SPAK dhe me çdo institucion kompetent, deri në sqarimin e plotë të së vërtetës dhe mbrojtjen e të drejtave tona ligjore”, deklaroi Pacolli.

Ai theksoi gjithashtu rëndësinë e respektimit të ligjit, të vendimeve gjyqësore dhe të së drejtës së pronës private, duke shprehur bindjen se drejtësia në Shqipëri do të veprojë në mënyrë të pavarur.

Çështja e Aeroportit Ndërkombëtar të Vlorës mbetet në fokus të deklaratave të Pacollit, i cili ka bërë të ditur se do të vazhdojë bashkëpunimin me institucionet përkatëse deri në sqarimin e pretendimeve të tij./rajonipress/