Kur hesht zilja e shkollës, hesht një pjesë e kombit!

Nga Shefik Sadiku – Sot është 1 shtatori. Kjo datë është sinonim i arsimit, i shkollës, i diturisë dhe i emancipimit. Viteve të fundit fillimi i mësimit nuk e ka as madhështinë, as lumturinë që ndjenim dikur për këtë datë, sepse numri i nxënësve drastikisht është zvogëluar e shumë klasa mësimore e shkolla po mbyllen. Katër shkolla qenkan mbyllur në rrethin e Strugës.

Nuk e dimë sa në Kosovë. Ajo që e dimë është se para disa vitesh hallin e kishim me numrin e madh të nxënësve nëpër klasa, sot ato klasa i kemi me 3 diku 2 diku 1 nxënës e nesër ato klasa e shkolla do të mbyllen për shkak të mërgimit enorm të shqiptarëve nga trojet tona.

Kjo po na ndodh sepse ne po merremi dy vjet duke mbajtur zgjedhje pa institucione legjitime.
Kjo që po ngjet me ne, mjerisht, po legjitimon pretendimin e armiqve tanë se nuk jemi të aftë të mbajmë shtet.

Brezi ynë, i ne të rriturve, ka obligim e amanet nga të rënët për këtë vend t’u krijojmë kushte të vegjëlve tanë derisa ata ta marrin në dorë fatin e tyre. Ne po dështojmë ! Ne po provokojmë zgjedhje shterpa, ne po stërkeqemi, ne po nxisim përqarje !

Aty ku ka shpesh zgjedhje, aty lulëzon varfëria, pasiguria, humbja e shpresës, anarkia, shpërngulja= tkurrja e gjeografisë kombëtare!