Alban Hyseni paralajmëron investime të reja në stadium, qytetarët e “gozhdojnë” për vonesat në Stadiumin e Qytetit

Gjilan – Kryetari i Komunës së Gjilanit, Alban Hyseni, ka bërë të ditur se komuna do të nisë investime kapitale edhe në Stadiumin Ndihmës, duke përfshirë rregullimin e infrastrukturës përcjellëse dhe vendosjen e reflektorëve modernë.

Në një postim në rrjetet sociale, Hyseni tha se këtë çështje e ka diskutuar me drejtuesit e dy klubeve të qytetit, FC Drita dhe SC Gjilani, ndërsa theksoi se investimet do të zhvillohen paralelisht me punët në Stadiumin e Qytetit.

“Lajmi i mirë është se po fillojmë me investime kapitale në Stadiumin Ndihmës. Ky projekt përfshin rregullimin e plotë të infrastrukturës përcjellëse dhe vendosjen e reflektorëve modernë”, ka shkruar Hyseni.

Megjithatë, postimi i kryetarit është pritur me kritika nga disa qytetarë, të cilët në komentet e tyre kanë shprehur skepticizëm për premtimet rreth projekteve sportive, duke e vënë theksin te zvarritja e punimeve në Stadiumin e Qytetit.

“Krejt pe dijn që tu rrejt je”, ka komentuar Leo’nard Ramadani.

Ndërsa Xhevdet Jeff Haliti, me ironi, ka shkruar: “Veç edhe ni fli po t’mungon n’tavolinë”.

Kritika ka pasur edhe për afatet e përfundimit të Stadiumit të Qytetit. Gazi Sadiku ka komentuar: “Kët stadiumin e qytetit që e ke nis, ma merr mendja që 2030 është pikëpyetje a kryhet”.

Ndërkaq, Selami Robeli ka rikujtuar kohën e gjatë të pritjes për përfundimin e stadiumit, duke shkruar: “Po po, në vitin 2016 kanë filluar punimet në Stadiumin e Qytetit, ende nuk kanë përfunduar punimet – 10 vite pritje”.

Kështu, paralajmërimi për investime të reja në infrastrukturën sportive ka hapur sërish debatin për realizimin e projekteve të mëdha sportive në Gjilan, veçanërisht për afatet dhe përfundimin e punimeve në Stadiumin e Qytetit./rajonipress/