Kamenica shënon Ditën e Çlirimit me aktivitet përkujtimor, nxënësit nderojnë sakrificën për liri

Kamenicë – Në kuadër të aktiviteteve për shënimin e Ditës së Çlirimit, Drejtoria Komunale e Arsimit në Kamenicë organizoi një aktivitet të veçantë përkujtimor me pjesëmarrjen e nxënësve, mësimdhënësve, veteranëve të luftës dhe qytetarëve, me synim ruajtjen dhe promovimin e vlerave të luftës çlirimtare të Kosovës.

Gjatë aktivitetit u theksua rëndësia e kujtesës historike dhe nevoja që brezat e rinj të njihen me sakrificat dhe kontributin e atyre që luftuan për lirinë e vendit. Të pranishmit patën mundësinë të dëgjojnë rrëfime dhe përjetime nga protagonistë të ngjarjeve historike, të cilët ndanë kujtimet e tyre nga periudhat më të vështira të Kosovës.

Drejtori i Drejtorisë Komunale të Arsimit, Selami Kllaiqi, tha se ky aktivitet po organizohet për herë të parë në kuadër të manifestimeve për Ditën e Çlirimit, duke e cilësuar atë si një mundësi të mirë për edukimin e brezave të rinj mbi vlerat e lirisë.

“Jemi të lumtur që nxënësit e shkollave tona janë gjithnjë e më të vetëdijshëm për kontributin dhe sakrificën e atyre që dhanë jetën për lirinë që ne e gëzojmë sot”, u shpreh Kllaiqi.

Të pranishmëve iu drejtua edhe Komandanti i Zonës Operative të Karadakut, Ahmet Isufi, i cili foli për luftën e Ushtrisë Çlirimtare të Kosovës dhe mbështetjen e aleatëve ndërkombëtarë në procesin e çlirimit të vendit.

“Është e rëndësishme që vlerat e luftës të kultivohen nga gjeneratat e reja dhe mbi këto vlera të vazhdohet puna për zhvillimin dhe forcimin e shtetit tonë”, tha Isufi.

Ndërkohë, kryetari i Organizatës së Veteranëve të Luftës së UÇK-së në Kamenicë, Milaim Limoni, vuri në pah sakrificën e dëshmorëve dhe rëndësinë e njohjes së historisë kombëtare nga të rinjtë.

“Liria që gëzojmë sot nuk erdhi rastësisht. Ajo u fitua me mund, sakrifica dhe me gjakun e dëshmorëve tanë. Detyra e brezit të ri është ta ndërtojë Kosovën përmes dijes, kulturës dhe përgjegjësisë qytetare”, theksoi Limoni.

Programi artistik i aktivitetit u pasurua me interpretime nga nxënësit e shkollave të Kamenicës. Nxënësja Elona Lipovica recitoi poezinë “Nëna” të Ismail Kadare, ndërsa Miradie Arifi interpretoi poezinë “Tung Europë” të Ali Podrimja. Gjithashtu, nxënësit e klasave të katërta dhe të teta prezantuan dramën “Pritja e nënlokes”, e cila u prit me emocione dhe duartrokitje nga publiku.

Aktiviteti u përmbyll me mesazhe mirënjohjeje për të gjithë ata që kontribuuan në lirinë e Kosovës, duke përcjellë te brezat e rinj rëndësinë e ruajtjes së kujtesës historike, identitetit kombëtar dhe vlerave mbi të cilat është ndërtuar shteti i Kosovës./rajonipress/