Gjilani triumfon në përballjen lokale, Drita mposhtet në derbin e fundit të sezonit

Gjilan – SC Gjilani ka arkëtuar tri pikë të rëndësishme në derbin e Anamoravës, pasi mposhti rivalin lokal FC Drita me rezultat 0:2, në ndeshjen e vlefshme për javën e 35-të të Superligës së Kosovës.

Skuadra kuqe-bardhë u shfaq më konkrete dhe më e organizuar në fushë, duke kontrolluar ritmin e takimit dhe duke shfrytëzuar rastet kryesore për të siguruar fitore në një nga përballjet më të ndjekura të kampionatit.

Gjilani e nisi ndeshjen në mënyrën më të mirë të mundshme, kur Besart Morina realizoi që në minutën e tretë, duke i dhënë epërsinë e hershme ekipit të tij dhe duke i vënë nën presion kampionët e shpallur të këtij edicioni.

Pavarësisht përpjekjeve të Dritës për të rikthyer baraspeshën, skuadra bardhekaltër hasi në një kundërshtar të disiplinuar dhe të vendosur në repartin defensiv.

Goli që vulosi triumfin e Gjilanit erdhi në minutën e 62-të, kur Robert Rrahmani finalizoi në mënyrë spektakolare një aksion të shpejtë, duke mposhtur portierin kundërshtar dhe duke konfirmuar dominimin e ekipit të tij në këtë duel lokal.

Me këtë fitore, Gjilani ngjitet në pozitën e gjashtë të tabelës me 48 pikë, ndërsa Drita, e cila tashmë ka siguruar titullin kampion, mbetet në kuotën e 66 pikëve./rajonipress/