LDK në Gjilan mes reformimit të domosdoshëm dhe rrezikut të thellimit të krizës

Gjilan – Dega e Lidhjes Demokratike të Kosovës (LDK) në Gjilan prej kohësh po përballet me një stagnim të theksuar politik dhe organizativ, duke reflektuar mungesë të dukshme të energjisë reformuese dhe të vizionit për ringritje. Rezultati i fundit zgjedhor, ku kandidati i kësaj partie Arbër Ismajli u mposht nga Alban Hyseni, u konsiderua nga shumë analistë dhe aktivistë si sinjal i qartë për nevojën urgjente të reformimit të brendshëm dhe hapjes ndaj kuadrove të reja.

Në terren, perceptimi i përgjithshëm është se LDK në Gjilan vazhdon të funksionojë nën ndikimin e një rrethi të ngushtë vendimmarrës, çka ka prodhuar pakënaqësi dhe, në raste të shumta, largim të aktivistëve të kahershëm. Kjo klimë e brendshme ka ndikuar në zbehjen e rolit politik të degës dhe në humbjen graduale të besimit publik.

Deklaratat e fundit të Lutfi Hazirit për “gjallërimin” e degës janë pritur me skepticizëm, sidomos në kontekstin e mungesës së ndryshimeve konkrete në strukturë dhe qasje. Edhe brenda partisë, zërat për reformë duket se janë zbehur, ndërsa individët që kanë kërkuar hapur ndryshime janë tërhequr ose kanë dhënë dorëheqje.

Pakënaqësitë janë reflektuar edhe publikisht nga ish-aktivistë të partisë. Edon Shkodra, ish-kryetar nëndege, në një reagim në rrjetet sociale ka ngritur shqetësime për mënyrën e trajtimit të kuadrove brenda strukturës, duke aluduar në praktika përjashtuese dhe degradim profesional. Një qëndrim të ngjashëm ka shprehur edhe Ekrem Hasani, ish-kryetar i nëndegës në Llashticë, duke konfirmuar përvojat negative të përmendura.

Në këtë kontekst, LDK në Gjilan ndodhet përballë një udhëkryqi politik: ose të ndërmarrë reforma të thella dhe të sinqerta për të rikthyer besimin e anëtarësisë dhe elektoratit, ose të përballet me rrezikun e thellimit të mëtejmë të krizës së brendshme dhe marginalizimit politik.

Dalja nga kjo situatë kërkon lidership të hapur, reflektim të thellë dhe një proces gjithëpërfshirës reformimi që do të rikthente funksionimin demokratik dhe meritokracinë brenda strukturave të saj.

Tensione dhe pakënaqësi brenda LDK-së në Gjilan, shtohen zërat për reformë

Zhvillimet e fundit brenda degës së LDK-së në Gjilan po shoqërohen me tensione të brendshme dhe pakënaqësi të shprehura publikisht nga ish-aktivistë dhe drejtues lokalë të partisë.

Burime të brendshme vlerësojnë se mungesa e reagimit kritik dhe e debatit të hapur ka krijuar një situatë ku lidershipi aktual nuk përballet me presion real për ndryshim.

Ndërkohë, zërat kritikë kanë ardhur kryesisht nga ish-aktivistë që tashmë janë larguar nga partia. Edon Shkodra, ish-kryetar nëndege, në një reagim publik në rrjetet sociale ka akuzuar drejtues të caktuar për përjashtim dhe degradim të kuadrove profesionale. “Për mua dhe për shumë të tjerë, vetë Lutfi Haziri me disa bashkëpunëtorë na la pa punë, pa kontrata dhe pa asnjë mbështetje. Mbi të gjitha, u nxit degradimi i profesionistëve”, ka shkruar ai, duke shtuar se “Zoti vonon, por nuk harron”.

Një qëndrim të ngjashëm ka shprehur edhe Ekrem Hasani, ish-kryetar i nëndegës në Llashticë, i cili ka mbështetur publikisht deklaratat e Shkodrës, duke konfirmuar pakënaqësitë e ngritura.

Këto zhvillime dëshmojnë për një klimë të tensionuar brenda degës së LDK-së në Gjilan, ku kërkesat për reformë dhe hapje ndaj kuadrove të reja po mbeten ende pa një përgjigje konkrete nga strukturat udhëheqëse./rajonipress/