Policia në Gjilan mban aktivitet sensibilizues për sigurinë e fëmijëve në trafik

Gjilan – Drejtoria Rajonale e Policisë në Gjilan, përmes Njësitit Sektorial dhe në Komunitet të Stacionit Policor në Gjilan, ka zhvilluar një aktivitet edukativ me fëmijët e kopshtit “Fjolla”, me qëllim rritjen e ndërgjegjësimit për sigurinë në trafikun rrugor.

Gjatë ligjëratës me temën “Siguria në Komunikacion”, fëmijët janë njoftuar me rregullat bazë të trafikut dhe rëndësinë e respektimit të tyre për sigurinë personale dhe të pjesëmarrësve të tjerë në komunikacion.

Pas pjesës teorike, aktiviteti është zhvilluar edhe në mënyrë praktike në rrugë, ku fëmijët, nën shoqërimin e edukatoreve të kopshtit dhe zyrtarëve policorë, janë njohur nga afër me vendkalimin për këmbësorë, shenjat e komunikacionit dhe mënyrën e sigurt të kalimit të rrugës. Gjithashtu, ata janë informuar për rëndësinë e sjelljes së sigurt gjatë qëndrimit në automjet gjatë udhëtimeve.

Policia e Gjilanit ka bërë të ditur se aktivitete të tilla kanë për qëllim edukimin dhe vetëdijesimin e fëmijëve që në moshë të hershme për rregullat e trafikut, me synim rritjen e sigurisë së tyre në rrugë dhe parandalimin e aksidenteve./rajonipress/