Shqiptari 20-vjeçar humb jetën në aksident rrugor në Nju-Jork

Një ngjarje e rëndë ka tronditur komunitetin shqiptar në Shtetet e Bashkuara, transmeton albinfo.ch. Thuhet se një 20-vjeçar me origjinë nga Shqipëria, Aaron Dreni, ka ndërruar jetë tragjikisht disa javë më parë pas një aksidenti rrugor në Nju-York.

Sipas njoftimeve të bëra publike nga familjarët, trupi i të ndjerit është përcjellë për në atdhe, ku më 3 tetor është varrosur në varrezat e Sharrës, në Tiranë.

Lajmi për humbjen e të riut u bë i ditur së fundmi në rrjete sociale, përmes një postimi prekës të familjes, i cili më pas u shpërnda edhe nga faqja e njohur e komunitetit shqiptar në SHBA, “Our Lady of Shkodra”.