Haziri inspekton punimet në ndërtim të rrugës që lidh Gjilanin me Ranillugun

Gjilan – Kryetari i Komunës së Gjilanit, Lutfi Haziri i shoqëruar nga nënkryetari Rexhep Kadriu me bashkëpunëtor të tjerë, kanë inspektuar punimet që janë duke u bërë në ndërtimin e rrugës, që lidhë Gjilanin me Ranillugun, respektivisht Kamenicën përmes fshatit Përlepnicë.

Haziri ka thënë se kjo rrugë e cila investohet nga buxheti i Komunës Gjilani, shkurton rrugën për në Kamenicë për më shumë se 11 kilometra dhe është një arterie e mirë edhe për bashkatdhetarët gjatë të ardhmes.

“Jemi në inspektim të punimeve në rrugën që lidhë Gjilanin me Ranillugun, respektivisht Kamenicën përmes fshatit Përlepnicë. Kjo është rruga e parë ndër – regjionale. Financimi i këtij projekti bëhet 100 % nga buxheti i Komunës së Gjilanit dhe do të jetë në shërbim të qytetarëve, duke shkurtuar rrugën për Kamenicë për 11 km. Gjithashtu shumë më e përshtatshme do të jetë kjo edhe për të marrë më shpejt pikën kufitare në Dheun e Bardhë. E shkarkon rrugën përmes fshatit Dobërqan dhe do të jetë një damar edhe për bashkatdhetarët, duke bërë shkurtimin e rrugës për në vendlindje. Në të njëjtën kohë po përcjellim edhe dinamikën e rrugëve që është duke u bërë në fshatin Shillovë dhe rrugë të tjera në Gjilan”, ka thënë kryetari Haziri ndër të tjerash.

Ai ka thënë se lloti i parë i hyrjes së madhe prej Gjilanit deri tek Fabrika e Baterive, do të investohet poashtu 100% nga Komuna e Gjilanit, ndërsa nga aty deri tek “Bunari i Përlepnicës” që është lloti i dytë, është në planet e Ministrisë së Infrastrukturës, për vitin e ardhshëm buxhetor.

Ndryshe, rruga që lidh dy komunat Gjilanin me Ranillugun është 2.2 km dhe ka një kosto buxhetore mbi 240 mijë euro, ndërsa afati për kryerjen e punimeve është 60 ditë, por operatori ekonomik është zotuar se puna do të përfundohet para kësaj kohe./rajonipress/