Në Gjilan shënohet “Dita e Kulturës Japoneze”

Gjilan – Komuna e Gjilanit, në kuadër të javës së vendeve mike të Republikës së Kosovës dhe në bashkëpunim me Agjencionin Japonez për Bashkëpunim Ndërkombëtar (JICA), ka shënuar sot “Ditën e Kulturës Japoneze” me një sërë aktivitetesh kulturore e sportive.I pranishëm në ngjarje ka qenë nënkryetari Rexhep Kadriu, përfaqësues të agjencionit JICA, kryetarja e shoqatës “JAAK”, Nezakete Hakaj, përfaqësues të Universitetit “Kadri Zeka” si dhe qytetarë të interesuar.

“Në kuadër të ditëve të diasporës, Komuna e Gjilanit po organizon javën e vendeve mike të cilat e kanë ndihmuar Komunën tonë në forma të ndryshme. Me këtë rast e falënderoj JICA-n për mbështetjen e madhe që i ka dhënë Gjilanit dhe besojmë që do ta vazhdojmë bashkëpunimin. Sot do të kemi aktivitetet e prezantime, derisa i kemi edhe përfaqësuesit nga shteti japonez të cilët do të demonstrojnë teknikat e tyre, sikurse e kemi edhe klubin e xhudos nga Gjilani. Ju uroj të kaloni mirë sot”, u shpreh me këtë rast nënkryetari Kadriu, i cili ka folur në emër të kryetarit Lutfi Haziri.

Kryetarja e shoqatës “JAAK”, Nezakete Hakaj, e ka falënderuar Komunën e Gjilanit për këtë mundësi që të promovohet tradita dhe kultura japoneze.

“E falënderoj Komunën e Gjilanit që e ka mundësuar që të promovohet tradita dhe kultura japoneze, shtet ky nga të parët që e ka njohur Pavarësinë e Kosovës. Qëllimi i shoqatës sonë është që t’i shpërndajmë njohuritë që i kemi marrë në Japoni, t’i marrim eksperiencat dhe t’i zhvillojmë edhe më tej sikur shteti i zhvilluar i Japonisë në aspektin e industrisë, por edhe me një traditë dhe kulturë të lashtë”, u shpreh zonja Hakaj.

Në këtë ngjarje është demonstruar aktiviteti i xhudos nga klubi i xhudos “Gjilani”, është realizuar një program kulturo-artistikë, një ekspozitë me gjëra japoneze, e shumë aktivitete tjera./rajonipress/