Gjetan Keta mbron titullin, mposht rusin

Gjetan Keta keta ka mposhtur boksierin rus Kanbolatov.
Boksieri Gjetan Keta mbrojti me sukses titullin Euroaziatik dhe të Paqësorit në peshën e mesme të versionit WBC, duke zhvilluar një ndeshje të jashtëzakonshme në “Gerry Weber Stadion” të Halles, ku fitoi me K.O në raundin e tretë.

Një sukses, i arritur ashtu siç i ka hije dhe nofkës së tij, Mike i “Hekurt”, teksa zhvilloi një duel ndaj rusit Kanbolatov, të cilin e dominoi nga fillimi deri në fund, duke e rrëzuar plot 6 herë, i cili nuk humbiste prej plot 4 vjetësh.

Ashtu siç ka bërë gjithmonë Gjetani, u ngjit mbi ring me motive shqiptare, tinguj, që i dhanë frymëzimin e duhur për ta nisur menjëherë në mënyrë agresive ndeshjen, aq sa në raundin e parë e rrëzoi dy herë kundërshtarin e tij, shkruan albeu.com.

Dhe në raundin e dytë, Keta, sërish me një seri kombinimesh me të majtën dhe të djathtën, nuk e lejoi për asnjë çast kundërshtarin të mbushej me frymë, duke mos i lejuar atij të shfrytëzonte dhe ato 10 centimetra gjatësi në favor. Kanbolatov u rrëzua dhe dy herë të tjera në tapet, por gjithsesi arriti ta mbyllë raundin, transmeton SuperSport.

Gongu nuk do ta shpëtonte më rusin, pasi në raundin e tretë, Keta e bëri sërish kundërshtarin e tij të ndjente erën e tapetit, përpara se ta rrëzonte përfundimisht për fitoren e tij të 19-të në karrierë, e 16-të me K.O.

Stafi i tij e ngriti mbi supe bashkë me Gjerdanin e Artë, Gjetanin, ndërsa vëllai Ismaili, bashkë me fanellën e Autochtonus, i qëndronte në krah i ndërgjegjshëm se për Gjetanin, tashmë mund të ketë ardhur momenti për të kërkuar “ëndrrën” amerikane duke synuar ngjitjen në ringun e më të mëdhenjve të boksit botëror./express/