Fillon procesi gjyqësor ndaj Valon Shefkiut dhe të tjerëve

Gjilan – Në Gjykatën Themelore të Gjilanit ka nisur procesi gjyqësor ndaj Valon Shefkiut dhe tre zyrtareve tjerë komunal të akuzuar për keqpërdorim të detyrës zyrtare.

Në gjykimin që po e kryeson gjykatësi Agim Ademi, të akuzuarit e kanë mohuar aktakuzën dhe veprat e ngarkuara.

Ndryshe Prokuroria Themelore në Gjilan, Departamenti i Krimeve të Rënda, ka ngritur aktakuzë kundër drejtorit të Urbanizmit në Komunën e Gjilanit, Valon Shefkiu, dhe tre zyrtarëve të tjerë komunalë për keqpërdorim të pozitës zyrtare.

Valon Shefkiu, akuzohet se gjatë periudhës kohore të vitit 2013-2014, në cilësi të inspektorit ndërtimor, duke shfrytëzuar autoritetin zyrtar, nuk ka marrë veprime zyrtare lidhur me rrënimin e objekteve pa leje dhe rrënimin e objekteve ku është tejkaluar leja e ndërtimit.

Sipas Prokurorisë, Shefkiu në mënyrë të kundërligjshme dhe në kundërshtim me interesat dhe qëllimet e Komunës së Gjilanit nuk ka ekzekutuar masën për rrënimin e këtyre objekteve.

Për vepër të njëjtë akuzohen edhe tre zyrtarët e tjerë komunalë: Merita Cana, Shkëndije Mahmuti dhe Baki Azemi./rajonipress/