Mësuesit fitojnë betejën, Apeli i shpall të pafajshëm

Gjilan – Gjykata e Apelit ka refuzuar si të pabazuar ankesën e Prokurorit të Prokurorisë Themelore të Gjilanit me arsyetimin se gjykata e shkallës së parë, drejt ka ardh në përfundim se me asnjë provë nuk është vërtetuar se të akuzuarit ta kenë kryer veprën penale që u vihet në barrë. Mësuesit e akuzuar Luljeta Dubova, Ramize Sylejmani, Jehona Sahiti, Mehmetali Sabedinaj, Xhevat Jahiri, Nijazi Hajdini, Adelina Haziri dhe Jeton Veliu përfundimisht lirohen nga akuzat.

Në aktgjykimin e Gjykatës së Apelit të kryesuar nga Gani Zabeli thuhet se refuzohet si e pabazuar ankesa e Prokurorit të Gjilanit. “Kolegji i Gjykatës së Apelit gjen se pretendimet e mësipërme ankimore nuk qëndrojnë, ngase aktgjykimi i ankimuar nuk përmban shkelje esenciale të dispozitave të procedurës penale. Sipas vlerësimit të kolegjit të Gjykatës së Apelit me vërtetimin e drejtë dhe të plotë të gjendjes faktike gjykata e shkallës së parë, drejtë ka ardhë në përfundim se me asnjë provë nuk është vërtetuar se të akuzuarit ta kenë kryer veprën penale që u vihet në barrë. Bazuar në provat e administruara gjykata e shkallës së parë drejt ka konkluduar se nuk është provuar se të akuzuarit e kanë kryer veprën penale për të cilën janë akuzuar, andaj në mungesë të provave edhe i ka liruar nga akuza, të cilin konkludim e mbështet edhe kjo gjykatë” thuhet në aktgjykimin e Apelit.

Avokati mbrojtës i Luljeta Dubovës, Shemsedin Pira tha për rajonipress se ky vendim edhe është pritur sepse në të gjitha fazat e procedurës është vlerësuar se klientët tanë janë të pafajshëm. “Vërtet ka qenë një gjykim me procedura maratonike, por fundi doli ashtu siç ne kemi pretenduar, e jo siç është thënë në aktakuzë” tha Pira.

Mësuesit e akuzuar Luljeta Dubova, Ramize Sylejmani, Jehona Sahiti, Mehmetali Sabedinaj, Xhevat Jahiri, Nijazi Hajdini, Adelina Haziri dhe Jeton Veliu përfundimisht lirohen nga akuzat. /rajonipress/