Drejtësia e kapitulluar

Analistët dhe njohësit e fushës së drejtësisë kanë ngritur shqetësimin e tyre për nivelin e përfaqësimit të drejtësisë së përgjithshme në vendin tonë, ngase, sipas tyre, bilanci ndërmjet Prokurorisë së Kosovës, e asaj të misionit të EULEX-it, por edhe i gjykatave vendore e të huaja në hetimet, ndjekjet penale dhe dënimet e politikanëve të nivelit të lartë të involvuar në afera korruptive, është i barabartë me zero. Andaj, është shtruar edhe pyetja se përse prokuroria e as gjykatat në fjalë nuk po mund të kenë asnjëherë dhe assesi bilanc pozitiv në çështjet e sipërpërmendura, përveç një dështimi permanent.

Dukuritë negative nuk po luftohen.

Analistët dhe njohësit e fushës së drejtësisë kanë ngritur shqetësimin e tyre për nivelin e përfaqësimit të drejtësisë së përgjithshme në vendin tonë, ngase, sipas tyre, bilanci ndërmjet Prokurorisë së Kosovës, e asaj të misionit të EULEX-it, por edhe i gjykatave vendore e të huaja në hetimet, ndjekjet penale dhe dënimet e politikanëve të nivelit të lartë të involvuar në afera korruptive, është i barabartë me zero. Andaj, është shtruar edhe pyetja se përse prokuroria e as gjykatat në fjalë nuk po mund të kenë asnjëherë dhe assesi bilanc pozitiv në çështjet e sipërpërmendura, përveç një dështimi permanent, shkruan gazeta Kosova Sot.

Analisti Florim Zeqa, në një prononcim për gazetën “Kosova Sot”, ka thënë se mungesa e dënimeve e të ashtuquajturve “peshq të mëdhenj”, apo të dyshuarve për korrupsion dhe krim të organizuar të nivelit të lartë nga drejtësia vendore dhe ndërkombëtare, i ka bërë, siç tha, gjykatat, prokuroritë, hetuesinë, policinë vendore dhe ndërkombëtare (EULEX-in) të pasuksesshme, apo thënë më ndryshe të dështuara dhe pa asnjë bilanc pozitiv sa i përket luftimit të krimit të organizuar dhe korrupsionit endemik në vendin tonë.”Spektaklet e kohëpaskohshme televizive të Policisë së EULEX-it, të kopjuara edhe nga Policia e Kosovës, s’janë gjë tjetër veçse maskarada mashtruese për mbulimin e dështimeve në kryerjen e misionit të tyre, për çka janë të thirrura dhe të përcaktuara me Kushtetutën e vendit”, ka vijuar më tej ai.

Dështimi i rëndë institucional

Sipas Zeqës, dështimi permanent i institucioneve të sipërpërmendura në arritjen e rezultateve të dëshiruara dhe të pritshme nga opinioni i gjerë, në luftimin e krimit të organizuar dhe korrupsionit, është rrjedhojë e lidhjeve të ngushta me bartësit e institucioneve të larta shtetërore, njëherësh siç tha, edhe të supozuarit kryesor në përfshirjen e aferave korruptive dhe kriminale në vend. “Andaj, kjo ka ndikuar në rënien drastike të besimit të qytetarëve tek EULEX-i, po ashtu edhe në Gjykata, Prokurori e Policinë e Kosovës. S’ka si të jetë ndryshe, kur përmes spektakleve televizive arrestohet një ‘peshk i madh’, derisa i njëjti pas pak ditësh apo javësh lirohet në ‘heshtje’ nga të njëjtat organe”, theksoi ai. “Viteve të fundit, paradoksalisht është bërë traditë nga Ministria e Punëve të Brendshme të gradohen oficerë të lartë dhe policë, që në një mënyrë apo tjetër kanë mbrojtur krimin e organizuar dhe korrupsionin në vend, ndërsa në anën tjetër ata që janë munduar me tërë qenien e tyre fizike t’i luftojnë dukuritë negative në vend, anashkalohen dhe heshtën nga eprorët e tyre, kryeministria dhe presidenca, për t’i “dekoruar” për së vdekuri viktimat e tyre, duke i shpallur heronj dhe martirë të shtetit të Kosovës!”, është shprehur Zeqa./kosova sot/