Demarkacioni na lë pa bukë

Banorët e rajonit të Rugovës thonë se me demarkacionin me Malin e Zi nuk po humbet vetëm toka e Kosovës, por edhe buka e rugovasve.

Tërheqja e ratifikimit të Marrëveshjes për Demarkacion me Malin e Zi nga ana e kryeministrit Isa Mustafa në emër të Qeverisë së Kosovës nuk i ka “zbutur” banorët e fshatrave të Rugovës. Në brezin kufitar me Malin e Zi, në Rugovë, pakënaqësia ndaj Qeverisë është rritur.

Ata thonë se nuk po humbin vetëm rugovasit, por e gjithë Kosova. Resurset e Rugovës banorët e kësaj ane, siç shprehen dhe vetë, i kanë shfrytëzuar për të siguruar ekzistencën. Ende dhe sot shumë banorë jetojnë nga të ardhurat që fitojnë prej shitjes së bagëtisë, produkteve të tyre, si dhe nga shfrytëzimi i pyjeve. Një familje mban deri në 15 krerë lopë, kurse blerës të produkteve të tyre janë banorët nga e gjithë Kosova.

Familjet rugovase ende ruajnë mikpritjen për atë që u troket në derë qoftë i huaj apo vendas. Pleqtë janë ata që po e ruajnë këtë traditë të shqiptarëve të mos zhduket. Por, kanë shumëçka të flasin e të tregojnë sidomos lidhur me pronat. Ende në kujtesën e tyre ruhen të freskëta konfliktet me malazezët për të mbrojtur kufirin./zeri/