Pushteti dështoi konsensusin

Kryeneçësia e subjekteve politike në koalicionin qeverisës që nuk i ka lejuar të iniciojnë asnjë debat me opozitën parlamentare, për çështjet kyçe në interes të vendit, demarkacionin, dialogun dhe asociacionin e komunave serbe, si çështje të rëndësishme që lidhen me të ardhmen evropiane të shtetit tonë, po e rrezikon seriozisht edhe liberalizimin e vizave për qytetarët e Kosovës.

Analistët politikë konsiderojnë se pikërisht kjo lojë inatesh është edhe një argument më i fuqishëm në dorën e qytetarit për ndëshkimin pa asnjë hezitim të kësaj klase politike që nuk është e gatshme të ulet në tavolinë për të gjetur zgjidhjen në interesin e shtetit, shkruan Gazeta Kosova Sot.

Njohësi i marrëdhënieve ndërkombëtare dhe diplomacisë, Adlum Ramadani, thotë se tani është shumë e qartë se koalicioni qeverisës ka dështuar të arrijë konsensus politik me opozitën mbi temat kyçe të interesit nacional. Si e tillë kjo klasë politike nuk e meriton të qeverisë tutje vendin.”Po që se e shikojmë nga këndvështrimi diplomatik, atëherë rezulton se ky grup negociator, pozitë dhe opozitë, fillimisht nuk janë të denjë për të udhëhequr e lëre më për të përfaqësuar një popull, pasi që imponimi apo përcaktimi i njëanshëm i rrjedhës së negociatave nënkupton dështim të negociatave, duke rrezikuar kështu interesin nacional si në rastin e Kosovës. Veprimet e tilla stagnojnë procesin e Kosovës për integrim në mekanizma ndërkombëtarë, njëherazi mbyllin edhe derën e mundësisë së liberalizmit”, theksoi ai.

Faji i përbashkët

Sipas analisti politik, Florim Zeqa, inatçitë politikë të vendit tonë, kur është në pyetje ndarja e pushtetit, i harrojnë të gjitha mosmarrëveshjet mes tyre, për t’u bashkuar në koalicione të panatyrshme pas zgjedhore pa asnjë problem, përderisa të njëjtëve u “bëhet” e pamundur ulja në një tavolinë kur janë në pyetje interesat e përgjithshme, qofshin nacionale apo shtetërore.”Për dështimin e konsensusit politik për temat kyçe, siç janë: dialogu me Serbinë në Bruksel, Demarkacioni me Malin e Zi, Asociacioni i komunave serbe etj., fajtorë janë të gjitha subjektet politike. Përderisa partitë në pushtet janë fajtore për paaftësinë e përballjes me temat madhore që ka vendi, partitë opozitare mbajnë përgjegjësinë në moskonsistimin e kundërshtimit të marrëveshjeve fatkeqe të nënshkruara nga ata të parët, pushtetarët, si dhe për përçarjen e panevojshme të bllokut opozitar.

Opozita vetëm e bashkuar mund të imponojë zgjidhje të shpejta për tema të ndjeshme për vendin, në të kundërtën. kështu siç është e çakorduar, i ka bërë pushtetarët të ndihen komod në pushtet, madje të relaksuar”, tha Zeqa për “Kosova Sot’.

Ai ka pohuar se tani me fajin e përbashkët të pushtetarëve dhe opozitarëve janë duke u prolonguar proceset integruese të shtetit, është duke u rrezikuar edhe liberalizimi i vizave për këtë vit, shkaku i kryeneçësisë së liderëve shtetëror në radhë të parë dhe atyre partiak në përgjithësi, për mos gatishmërinë e komunikimit normal për temat jetike që kanë të bëjnë me të ardhmen e vendit, prandaj edhe duhet të ndëshkohen njëso nga qytetarët.”Ky lloj inati personal mes liderëve partiakë dhe shtetërorë, nuk guxon të kalojë pa u ndëshkuar nga qytetarët e vendit. Kjo klasë e papërgjegjshme politike në pushtet dhe opozitë, që nuk është e gatshme të ulet në tavolinë për interesin e shtetit e meriton të ndëshkohet pa asnjë hezitim me dorën e qytetarëve të vendit në zgjedhjet e ardhshme nacionale”, tha analisti politik Florim Zeqa./kosova sot/