Të gjithë, i madh e i vogël te mbreti Hashim!

Nga Adrian Çollaku – Presidenti i ri i Kosovës Hashim Thaçi, po tregon pse është njeriu më i fuqishëm në Kosovë. Është thjesht, vetë mbreti.

Thuajse i madh e i vogël i shkuan për t’i “raportuar” në zyrën e re. Nëse këtë në të kaluarën e bënin jo zyrtarisht dhe në mënyra sekrete, tani e bëjnë edhe publikisht dhe krejt në mënyrë normale.

Duke filluar nga drejtori i Agjencisë Kundër Korrupsionit, kryetarja e KQZ-së, gjyqtarë e prokurorë, e deri tek drejtuesja e instancës më të lartë gjyqësore në vend, e cila duhet ta mbrojë Kushtetutën e Kosovës dhe kushtetutshmërinë e vendit-Arta Rama. Kulminacioni duket se u arrit, pikërisht me shkuarjen e kryetares së Gjykatës Kushtetuese tek presidenti, i cili i kërkoi Ramës që ta mbrojë kushtetshmërinë, edhe pse Kushtetuta është ajo e cila ia tregon detyrat dhe përgjegjësitë gjithsecilit.

Kryetarja e “shkretë” e di se pushtetet janë të ndara, por kur është fjala për të shkuar te mbreti, kush guxon të thotë jo?!

Ajo e di gjithashtu, se institucioni që ajo drejton, i ka rrëzuar hiç më pak se dy presidentë: Fatmir Sejdiun dhe Behgjet Pacollin.

E di gjithashtu, se pikërisht institucioni që drejton qe dy vite, mori një vendim të çuditshëm- kur doli kundër vullnetit të popullit, vetëm e vetëm që Hashim Thaçin ta mbajë në pushtet, dhe atë me çdo kusht.

Ajo gjithashtu e di, që para pak javësh, pikërisht gjykata që ajo drejton, e vulosi Thaçin si të parin e shtetit…

Dhe ndoshta, duhet të priste pak muaj që të mos vraponte menjëherë te mbreti dhe të mos e rrëzonte publikisht dhe teorikisht atë, se Gjykata Kushtetuese është në “krye të mbrojtjes” së Kushtetutës dhe kushtetshmërisë në këtë vend.

Megjithatë, duket se nga e gjithë kjo mënyrë se si të gjithë, thuajse i madh e i vogël po “palohen” para mbretit, doli diçka pozitive-që edhe publikisht dihet që më nuk kemi institucione të pavarura.

Thjesht, prej A-së deri në ZH janë të kontrolluara nga mbreti, i cili arriti gjithashtu që t’i djegë goxha shumë edhe Ramush Haradinajn e Jakup Krasniqin, me cakërrimin e gotave.

Prandaj, s’kemi si të mos e urojmë mbretin Hashim për detyrën e re. Urime!