Lirimi është bartur disa orë në krah të nënës i vdekur!

Gjilan – Lirim Shabani është i lindur një ditë para se të fillojë bombardimet e NATO-s në caqet serbe në Kosovë, më 23 mars 1999. Vdekja e Lirimit është tejet e dhimbshme. Ajo vdekje nuk harrohet asnjëherë në jetë. Kur lindi Lirimi, u gëzuan tërë anëtarët e familjes Shabani në Llashticë. Ishte fëmija i parë, gëzimi i jetës… Por, lufta është përbindshe që i merr njerëzit para kohe. E mori edhe Lirimin foshnje dyjavëshe.

I ati i Lirimit, ato ditë, kur u kthye në vendlindje, pati shtuar: “Kur lindi Lirimi, jam gëzuar shumë, por janë gëzuar edhe të tjerët. Unë e pagëzova me emrin Lirim. E ndjeja në vete se është kohë e fundit jona që të lirohemi njëherë e përgjithmonë nga shkjau. Momenti ma imponoi që ta pagëzoja fëmijën tim e emrin Lirim. Ishte kohë lufte.Ikëm në mal. Na mungoi ushqimi. Lirimi u bart ditë e natë në duar në qiellin e hapur, herë i kthjellët e herë me shi. Kur na zunë paramilitarët serbë, në mal, ata na maltretuan shumë. Na rrahën e na fyen tejmase. Unë isha i plagosur. Ashtu na sollën mbi fshat. Lirimi na vdiq. Deshëm ta varrosim në mal, paramilitarët serbë nuk na lejuan. Na rreshtuan. I ndanë gratë nga meshkujt. Ishte data 13 prill 1999. Pasi na plaçkitën e na dërrmuan, paramilitarët na drejtuan me traktora për në fshatin Sllatinë. Lirimi është bartur i vdekur në krahët e nënës së tij. Nëna e tij prore ka qajtur rrugës. Kur arritëm në Kllokot me 70 traktorë me njerëz, paramilitarët serbë na kontrolluan. Na gjetën foshnjën e vdekur. Na liruan dhe vazhduam rrugën për në Sllatinë.Lirimi është varrosur në oborrin e xhamisë, më 13 prill në Sllatinë, ka shtuar Nehat Shabani, prindër i Lirimit.

Kjo ishte viktima e pestë e familjes Shabani nga Llashtica e Gjilanit. Prindi i tij, Nehat Shabani, sot e përkujton 17-vjetorin e vdekjes së djalit të tij Lirim Shabani, i cili nga torturat që pësoi në kraharorin e nënës së vet, ai vdes në mal. Lirimi ishte foshnje 3-javëshe, kështu tani ai do të ishte 17 vjeçar, por Liria qenka e shtrenjtë dhe gjaku i tij, neve na bëftë dritë përgjithmonë për Lirinë dhe Pavarësinë e Kosovës”, ka shtuar Nehat Shabani, prindër i Lirimit. /tefik selimi/rajonipress/