Ambasadori britanik O’Connelli në Viti për të përkujtuar gazetarin Kerim Lewton

Viti – Në përvjetorin e 15 të vrasjes së gazetarit Kerim Lewton, sot në Viti ka qëndruar ambasadori britanik Ruairi O’Connelli, i cili së bashku me kryetarin e komunës së Vitisë, vendosën kurora lulesh tek memoriali i gazetarit të ndjerë britanik.

Me këtë rast, kryetari Sokol Haliti, ka theksuar se dita e sotme kur kujtohet vrasja e gazetarit Kerim Lewton, është një ditë përmes së cilës gazetarët duhet të reflektojnë se sa ka vlerë liria e shtypit në botë, kurse për ne përfaqësuesit e institucioneve, do të shërbej si një moment që na obligon të punojmë drejt dhe pa dallim, duke respektuar gjithmonë lirinë e shtypit. “Ju ftoj që bashkërisht të punojmë drejt ndërtimit të një shoqërie demokratike ku çmohen të gjitha vlerat”, ka thënë Haliti.

Kurse ambasadori O’Connelli , duke falënderuar të pranishmit, ka thënë se është më se e nevojshme për të krijuar një shoqëri me kulturë dhe vlerat që mbrojnë gazetarët. “Është një nga shtyllat më të rëndësishme të demokracisë, të kemi media të lira. “Është shembulli i Kerim Lewtonit që tregon ballafaqimin e gazetarëve me kërcënime e rreziqe të ndryshme. Gjithmonë duhet ditur se çmimi për lirinë e shtypit është I madh dhe në këtë drejtim kërkohet një përkushtim më i madh Institucional për të ruajtur gazetarët”, ka thënë ambasadori britanik.

Në vizitën që u bë pranë memorialit të gazetarit Kerim Lewton në Viti, ishin edhe familjarët e gazetarit të ndjerë.

Ndryshe, Kerim Lewton, ishte vrarë në fshatin kufitar Pustenik më 29 mars 2001, gjatë raportimit nga zona e luftës në Maqedoni./rajonipress/