Bajrami: Asnjë parti politike nuk ka guxim ta vizitojë Karadakun

Gjilan – Shefket Bajrami nga fshati Çelik thotë se shumë premtime ka pasur për Karadakun e asnjë nuk është krye. Kjo edhe është arsyeja që asnjë parti politike nuk guxon ta vizitojë këtë anë.

Shefket Bajrami nga fshati Çelik që gjendet shumë afër pikës kufitare me Maqedoninë thotë se ndihet i zhgënjyer me institucionet komunale të cilat e harruan këtë pjesë duke mos investuar asnjë projekt serioz që do të mund të kthente shpresat e banorëve për kthim në brezin kufitar. “Komuna na ka harruar, por edhe të tjerët dhe partitë politike nuk po kanë fytyrë me na vizitue sepse kanë premtuar shumë e skano realizuar asgjë” shprehet i revoltuar Bajrami.

Që kur ka filluar të flitet për rrugën Gjilan – Kumanovë janë ndërtuar disa shtëpi të reja në këto anë, por mungesa e investimeve në infrastrukturë e stopon këtë dëshirë të banorëve shprehet Bajrami.

“Janë hapur biznese të reja dhe realisht rruga do ta zhvillonte turizmin, bujqësinë, por mbi të gjitha rruga do ta ndalonte shpërnguljen dhe do t`i kthente shumë familje në fshat. Ne kemi lidhje familjare me fshatrat shqiptare në Kumanovë dhe do të jetë një rilindje për këto zona, nëse realizohet ëndrra e kamotshme e rrugës së vjetër Gjilan – Kumanovë” tha Bajrami.

Sipas Bajramit institucionet komunale duhet të zgjohen nga gjumi dhe të jenë afër banorëve të brezit kufitar, e jo duke anashkaluar dhe injoruar kërkesat tona reale./rajonipress/