Gjykata e Apelit në Prishtinë vendos për rastin e Blerta Halimit
RajoniPress
09:15, 27 Prill, 2013
Gjilan – Kreu i Gjykatës Themelore në Gjilan Zyhdi Haziri tha për rajonipress se ka një muaj që rasti i Blerta Halimit është marrë për shqyrtim nga Gjykata e Apelit në Prishtinë. Prindi i Blertës, Enver Halimi thotë se i ka humbur të gjitha shpresat tek sistemi gjyqësor.
Rasti i Blerta Halimit nxënëses së Gjimnazit “Zenel Hajdini” e cila pas aksidentit ka mbetur e palëvizshme në shtëpi, pas protestës së fundit në përkrahje të rastit të saj, ka filluar të merret me prioritet nga Gjykata e Gjilanit.
Kreu i Gjykatës Themelore në Gjilan Zyhdi Haziri tha për rajonipress se ka një muaj që rasti i Blerta Halimit është marrë për shqyrtim nga Gjykata e Apelit në Prishtinë.
”Unë e kam takuar delegacionin e protestuesve të Gjimnazit “Zenel Hajdini” dhe u kam shpjeguar procedurën gjyqësore. Pas Gjykatës së Apelit i mbetet të vendos pastaj edhe Gjykata Supreme e Kosovës. Ne i kemi dhënë prioritet kësaj lënde pikërisht për shkak të ndjeshmërisë së rastit” tha Haziri.
Prindi i Blertës, Enver Halimi(në foto) thotë se i ka humbur të gjitha shpresat tek sistemi gjyqësor. “I vetmi institucion që na është përgjigjur deri tani është Ombudspersoni i Kosovës. Unë nuk e di se çfarë duhet të bëjë që Blerta të trajtohet si duhet. Vajza që nga 23 nëntori 2011 është e palëvizshme dhe në shtrat e lidhur dhe nën kujdestarin e familjes. Gjykata e Gjilanit na ka fyer dhe poshtëruar dhe kjo ishte arsyeja që reaguan edhe të tjerët. Unë nuk do të heq dorë nga e drejta që rasti i Blertës të sqarohet deri në fund” tha Halimi.
Halimi thotë se nëse është nevoja do të kërkojë ndihmë edhe nga EULEX-i dhe nga të gjitha ambasadat e huaja në Prishtinë. “Rasti i Blertës është për tu studiuar nga studiues e njohës të fushës juridike. Është vërtet një shkelje flagrante e të drejtave të njeriut dhe do të bëjë të pamundurën që rastin ta dërgojmë edhe në Gjykatën Supreme edhe në Gjykatën Kushtetuese” thotë ai.
Sipas tij mbi 8 muaj Blerta ka qëndruar në mjekim intensiv kurse mbi katër muaj në gjendje kome. “Jemi ankuar në të gjitha instancat edhe gjyqësore edhe për të drejtat e njeriut, por gajdja nuk po ndryshon. Kërkoj drejtësi dhe që rasti të rihetohet dhe rishikohet” tha ai.