Bunjaku fton Perdedajn kundër Haitit

Fanol Perdedaj, mesfushori i Energie Cottbusit, është futbollisti i parë që ka konfirmuar se do ta bartë fanellën e Kosovës në ndeshjen miqësore ndaj Haitit, e cila do të luhet me 5 mars.

Selektori i Kosovës, Albert Bunjaku i ka bërë ftesë mesfushorit të Energie Cottbus, Fanol Perdedajt për ndeshjen miqësore kundër Haitit, e cila do të zhvillohet me 5 mars në Mitrovicë.

Këtë e ka konfirmuar për Express 22 vjeçari, i cili më herët ka luajtur te skuadra e Hertha Berlinit dhe te ekipi danez, Lyngby.

“Alberti më ka ftuar në skuadër për ndeshjen miqësore kundër Haitit. Unë e kam pranuar ftesën dhe me 5 mars do të jem në Kosovës”, ka thënë Perdedaj

“Unë jam nga Kosova dhe jam i lumtur që do të kem mundësi ta përfaqësoj vendin tim”, ka deklaruar Perdedaj, i cili në gjermani krahasohet me Genaro Gattuson.

Perdedaj më herët e ka përfaqësuar Gjermaninë. Mesfushori kosovar ka luajtur me ekipin U-19, U20 dhe U-21 të këtij vendi.

Kurse, në sezonin 2011-2013, Perdedaj ka zhvilluar 8 ndeshje me Hertha Berlinin në Bundesligë. Ndërsa, një sezon më herët, 22 vjeçari kishte luajtur 16 takime me Herthan në Bundesliga 2.

Në sezonin 2012-2013, Perdedaj ishte pjesë e ekipit danez Lyngby, me të cilin luajti 22 ndeshje, derisa gjatë afatit të janarit u transferua te ekipi nga Bundesliga 2, Energie Cottbus.

Ndërsa, Albert Bnjaku ka paralajmëruar se me 2 mars do të bëjë publike emrat e futbollistëve të ftuar për ndeshjen e 5 marsit.