Reja: Berisha s’e bëri asnjë paradë

Trajneri i Lazios, Edy Reja, i pyetur nga mediat italiane për paraqitjen e portierit kosovar, Etrit Berisha, në takimin e fituar 2:0 ndaj Chievos të dielën, tha se ‘gardiani’ i portës romake nuk pati fare punë.

“Jam i kënaqur me lojën e lojtarëve, e cila po rritet vazhdimisht. Veçanërisht jam i kënaqur për pjesën e dytë, në të cilën Berisha nuk bëri asnjë paradë”, tha Reja, shkruan ‘itasportpress.it’.

Që prej inkuadrimit në portë të portierit të kombëtares shqiptare, në fillim të janarit, Lazio ka pësuar vetëm një humbje, dhe atë në kuadër të Kupës ndaj Napolit. Lorik Cana në takimin me Chievon dhe atë me Napolin nuk ishte as në bankinë, pasi po vuan nga një lëndim.

Pas javës 22, Lazio zë vendin e nëntë me 31 pikë të tubuara. Reja u emërua trajneri i tyre në fillim të këtij viti. Pikërisht ai ia besoi portën Etrit Berishës.