Nikçi pranon gabimet e bëra

Mesfushori i Hannoverit, Adrian Nikçi, pranon se ka bërë shumë gabime të rënda gjatë vitit të kaluar. Ai të premten në një intervistë për “bazonline.ch” ka thënë se ambiciet për t’iu kthyer ekipit e kanë shtyrë që të mos presë deri në shërimin e plotë të sëmundjes së meningjitit.

“Kam bërë gabim të rëndë. Ambicia ime më ka shtyrë që sa më shpejt të nis stërvitjet. Trupi im nuk ishte ende gati. Pastaj kam pasur edhe disa lëndime të lehta që nuk ishin të favorshme për mua”, ka thënë Nikçi. 24-vjeçari këtë edicion nuk ka zhvilluar asnjë ndeshje me ekipin e parë të Hannoverit.

Trajneri i skuadrës gjermane ditë më parë vendosi ta largojë Nikçin nga ekipi i parë tek ai U23. Ai nuk ka përjashtuar kthimin në kampionatin zviceran.