Vijona Kryeziu dhe Musa Hajdari u shpallën sportistët më të mirë në Kamenicë

Kamenicë – Në shtëpinë e kulturës “Isa Kastrati“, në Kamenicë, është bërë zgjedhja e sportistëve, klubeve dhe trajnerëve më të mirë për vitin kalendarik 2013.
Në këtë eveniment, pos sportistëve të pranishëm ishin edhe nënkryetari Fatmir Matoshi, kryesuesit të Kuvendit Bajram Dërmaku, drejtoresha e Drejtorisë për Kulturë, Rini dhe Sport, Venera Dërmaku- Rexha, drejtorët nga drejtoritë tjera komunale dhe qytetarë të Dardanës.

“Vullneti i juaj nuk ka munguar asnjëherë, përkundër kushteve të vështira që ju kanë përcjellë për të arritur këto suksese. Unë ju uroj që sukseset e juaja të vazhdojnë edhe më tutje “ ka thënë Kryesuesi i Kuvendit Bajram Dërmaku.

Ndërkaq, drejtoresha e drejtorisë për Kulturë, Rini dhe Sport, Venera Dermaku-Rexha, më vjen mirë që me marrjen e detyrës jam në mesin e juaj. “Më vjen mirë që komuna e jonë ka këso sportistë e sportiste të dalluara, besoj se bashkëpunimi nuk do të mungoj as në të ardhmen” ka thënë Dërmaku-Rexha.

Nënkryetari, Fatmir Matoshi, kam kënaqësinë që jam në këtë ngjarje, ndjehem krenarë që komunës së Kamenicës, nuk i kanë munguar asnjëherë sukseset.“Si komunë bashkërisht me Kryetarin e komunës së Kamenicës, Begzad Sinani, do t’i japim vëmendje më shumë sportit dhe do të mbështesim edhe më shumë sektorin e sportit” ka thënë Matoshi.

Klubi më i suksesshëm është shpallur klubi i volejbollit “Flaka” i femrave, ndërkaq, trajneri më i mirë i vitit u shpall Zijadin Kryeziu, trajner i klubit i atletikës “Rogana”.Me mirënjohje e medalje u shpërblyen këta sportistë të dalluar : Vullnet Bunjaku- klubi i atletikës “Arbëria”, Fisnik Ismajli- klubi i karatesë “Shogun”, Sabri Aliu- klubi i shenjëtarisë “Dardania”, Ilir Zubaku- klubi i futbollit “Kamenica”, Elza Maliqi- klubi i volejbollit “ Arbëria”, Minire Kryeziu- klubi i volejbollit “Flaka”, Nezir Rahimi- klubi i futbollit “Kamenica”, Beslind Kastrati nga klubi i futbollit “Kaolini”, Blerina Spahiu, klubi i volejbollit “Flaka “Majlinda Cana klubi i atletikës “Rogana”, Granit Kryeziu- klubi i atletikës “Rogana “dhe Astrit Kryeziu “- klubi i atletikës “ Rogana”.

Ndërkaq, sportistja dhe sportisti më i mirë për vitin 2013 u shpallën dy anëtarë të klubit të atletikës “Rogana” nga Rogana, Vijona Kryeziu dhe Musa Hajdari./rajonipress/